Politika -

Eusko Alkartasuna

Joseba Gezuraga izango da EAko jarduneko idazkari nagusia

Pello Urizarrek dimisioa eman ostean, Joseba Gezuragak zuzenduko du Eusko Alkartasuneko idazkari nagusi berria aukeratzeko barne-prozesua.

Joseba Gezuraga. Argazkia: Eusko Alkartasuna
Joseba Gezuraga.
Joseba Gezuraga. Argazkia: Eusko Alkartasuna

AGENTZIAK | ERREDAKZIOA

Whatsapp Facebook Twitter Telegram Email

Joseba Gezuraga izango da Eusko Alkartasuna alderdiko jarduneko idazkari nagusia, alderdi horretako Nazio Batzarrak ostegun honetan erabaki duenez.

Pello Urizarrek dimisioa eman zuen ekainaren 24an, eta haren ordezkoa aukeratu behar dute orain. Idazkari nagusia aukeratzeko barne-prozesua Gezuragak zuzenduko du.

Gezuraga (Lekeitio, 1959) Eusko Alkartasunaren sorreratik, 1986tik, da alderdi horretako kidea. "Udalgintzari lotutako gizona da, ondo ezagutzen dute Lekeition, eta alderdiaren baitan ere ondo ezagutzen dugu, barruan nahiz kargu publikoetan egin duen lanagatik", adierazi du EAk ohar bidez.

Lanbidez irakaslea da. Leioako Ostalaritza Eskolan aritu da lanean. Lekeitioko zinegotzia izan zen 1987tik 1999ra bitartean. Zortzi urtez izan da EAko Nazio Batzarreko presidentea, eta Bizkaiko koordinatzailea izan zen 2017ra arte.

Hiru legealdi egin ditu Bizkaiko Batzar Nagusietan: 2007an, EArekin; 2011n, Bildurekin; eta 2015ean, EH Bildurekin.

Hau zure interesekoa bada, baliteke beste gai hauek ere izatea
Politika EA Eguneko albisteak Albisteak