Urkullu: 'Egoera larriagoa da orain, kultura politiko berri baten alde egin behar da'

Iñigo Urkullu lehendakariaren iritziz, Espainiako egungo egoera "apirilaren 29koa baino konplikatuago eta larriagoa da". Horren aurrean, "kultura politiko berri" baten aldeko apustua egin du, "elkarrizketaren ordez hauteskundeak deitzearen errekurtsoa ez baita irtenbidea".

Hauteskundeen biharamunean, emaitzen inguruko iritzia eman du lehendakariak, Bergaran lanbide heziketaren zentro bat bisitatu ostean.

Euskadin izandako emaitzak "positiboki" hartu ditu lehendakariak. EAJk irabazi ditu A10eko bozak EAEn, zazpi eserlekurekin.

Lehendakariaren esanetan, emaitzok "herri honen gobernagarritasunaren abal eta euskarri gisa interpretatzen ditugu".

"Euskadik egonkortasunaren eta gobernagarritasunaren bideari eutsi behar dio. Gizartearen eskaerei eta beharrei erantzuten jarraitzea ahalbidetzen duen aktiboa da, eta hori izan behar da guztiaren gainetik zaindu behar dugun lehentasuna", nabarmendu du.

Urkulluk aitortu du Espainiako egoerak Euskadiri eragiten diola, baina erantsi du agerikoa dela Euskadiko jendarteak "politika egiteko beste modu baten" alde egiten duela.

Espainiako egoera aztergai, A10aren ondotik "zatiketa eta polarizazio" handiagoa dagoela esan du lehendakariak. Horren iritzian, "ezinezkoa da ziurgabetasuna eta ezegonkortasuna besterik sortzen ez duen ekintza politiko eta instituzionalaren ildoan sartzea". Ildo horretan, kritikatu du "elkarri errua leporatzen atzo alderdiek emandako ikuskizuna" bidea ez dela.