Politika -
Maiatzaren 22ko hauteskundeak
Zeraingo Herri Kandidaturak Konstituzionalera joko du
Akats informatiko batengatik PPri eman zioten zinegotzia berreskuratu nahi dute. PPk dagoeneko esan du ez dutela ordezkaririk izan nahi ez dagokien lekuan.
Erredakzioa
Zeraingo Herri Kandidatura (ZHK) hautesle-zerrendak Auzitegi Konstituzionalera joko du maiatzaren 22ko hauteskundeetan izandako akats informatiko batengatik PPri eman zitzaion zinegotzia berreskuratzeko.
Egun Udalean agintzen duen hautesle-zerrendak erabaki horixe hartu du bart udaletxean egindako bilera batean. Herriko 250 biztanleetako 100ek parte hartu duten bilera horretan, ZHK-k agiri batean azaldu duenez.
Maiatzaren 22ko hauteskundeen ondoren, plataforma independente horrek lau zinegotzi eskuratu zituen 108 botorekin, eta PPk ordezkari bat lortu zuen boto bakar bat jasota.
Hala ere, ez dagokio zinegotzi banaketa hori, izan ere, akatsa eman zuen botoak zenbatzen dituen ordenagailuak eta ez zuten konpontzerik izan Azpeitiko Hauteskunde Batzordean maiatzaren 25ean egindako boto zenbaketan.
ZHK-k helegitea jarri zuen EAEko Justizia Auzitegi Nagusian, baina horrek atzera bota zuen salaketan akatsen bat egin zutelako.
Gipuzkoako PPk argi adierazi du ez duela ordezkaririk izan nahi ez dagokion tokian eta Udalarekin batera irtenbidea bilatzen saiatuko dela jakinarazi du.
ZHK-k publiko egindako agirian, eskerrak eman dizkio PPri "izandako jarreragatik, eta hasiera-hasieratik onartzeagatik boto batekin ez zutela zinegotzirik izan behar". Era berean, popularrei "zinegotzi karguari uko egiteko" eskatu diete.
"Hauteskunde-sisteman akats larria" egon dela berretsi du ZHK-k, "boto zenbaketa zuzena eta ezarritako prozedura" bete dutelako.
