Urizarren arabera, Bilduk "beste era batera" bilatuko ditu irtenbideak

Pello Urizar EAko idazkari nagusiak eta Bildu koalizioko ordezkariaren esanetan, Bilduk "gauzak egiteko beste era bat du, konponbideak aurkitzeko formula desberdinak baitaude".

Koalizioa "sistemaren aurkakoa" dela esaten dutenei erantzunez adierazi duenez, "agian hori leporatzen digutenak dira sistema apurtzen ari direnak".

Radio Euskadin emandako elkarrizketan, Andoaingo Udalak bizkartzainen inguruan hartu duen erabakiaz ere mintzatu da Urizar. Koalizioko ordezkariak esan duenez, Rodolfo Ares Barne sailburuarekin hitz egin dute sortutako "krisia" konpontzeko ahaleginetan, eta Barne Saileko ordezkariekin biltzeko zain dagoela gaineratu du.

Bestalde, Bilduren hautagaia Gipuzkoako ahaldun nagusi izendatzen badute, lurraldea ez duela "izura edo Erdi Arora" eramango azpimarratu du.