Bizkaiko PPko militanteek Gonzalezi babesa adierazi diote kritiken aurrean

Raquel Gonzalez Bizkaiko PPren presidenteari babesa adierazi diote 300 alderdikidek. Bilboko Udalean egindako Gabonetako brindisak "polemika" sortu zuen atzo. Gonzalezek gainerako bozeramaileekin batera topa egin zuen, tartean EH Bildu. Gertatutakoa "kanpaina antolatu" bat izan dela salatu dute Gonzalezen alderdikideek.

Komunikabideei igorritako gutun batean, topa "aspaldiko urteetan egin" izan dutela gogorarazi dute alderdikideek, eta orain arte "PPko bozeramaile guztiek parte hartu dute", baina "sekula ez da ezer esan, ekitaldi instituzional bat delako".

"Gabonetako brindisarekin lotuta, zure kontra -eta gu guztion aurka- antolatutako kanpainaren aurrean gure babesa adierazi nahi dizugu", esan dute. Bilboko PPk "ez du espazio publiko edo instituzionalik utzi behar biolentoen presentziagatik; gure presentzia sendotu behar dugu gonbidatzen gaituzten ekitaldietan edo ordezkari publiko gisa egon behar garenean", erantsi dutenez.

Azpimarratu dutenez, "norbaitek alde egin behar badu, eurak dira, ETAren lagunek". "Aski da! biolentoei eta konplizeei espazioak uztea amaitu da", gaineratu dute.

Zentzu horretan, "anonimoren baten kritikek" ezin dute Raquel Gonzalezen iragana ezkutatu, "guardia zibil baten alaba eta biktima" baita.

"ETAko biktimen eta Espainiako batasunaren defentsa norbaitek zalantzan jartzea benetan gaitzesgarria da. Ezagutzen zaitugunok ondo dakigu nola pasatu duzun, orain dela gutxi ‘batasuno’ei ongietorrietan aurre egin diezulako", gogorarazi dute.

"Karguetan eta PPren kontrolean begiak jarri dituztenen partetik kanpaina antolatu baten parte da guzti hau", kritikatu dute.

"Nortzuk diren ere badakigu. Espainia eta batasunaren defentsa oso gutxi axola zaiela badakigu. Aberri baino soldata bat gehiago maite dute. Abertzaleek, PPko afiliatuek, non egon behar garen badakigu, Espainia, batasuna eta biktimen memoriaren defentsan", ohartarazi dute.