Politika -

Inbestidura

Sanchezen inbestidura eztabaida urtarrilaren 4an, 5ean eta 7an egingo dute

Horrela jakinarazi die Meritxell Batet Kongresuko presidenteak talde parlamentarioetako ordezkariei.

Pedro Sanchez, Kongresuan. Artxiboko argazkia: EFE
Pedro Sanchez.
Pedro Sanchez, Kongresuan. Artxiboko argazkia: EFE

Agentziak | Erredakzioa

Whatsapp Facebook Twitter Telegram Email

Pedro Sanchez hautagai sozialistaren inbestidurarako eztabaida urtarrilaren 4an, 5ean eta 7an egitea erabaki du Meritxell Batet Kongresuko presidenteak, talde parlamentarioetako ordezkariei astearte honetan jakinarazi dienez.

Azaroaren 10eko hauteskundeetako emaitzak ezagutu bezain laster, Sanchez Gabonak iritsi aurretik presidente izenda zezaten lan egingo zuela ziurtatu zuen PSOEk. Alabaina, handik denbora gutxira urte amaieraz hitz egin zuten, eta Errege eguna baino lehen inbestitzea izan zen alderdi sozialistak hizpide izan zuen azken data.

Alabaina, ERCren abstentzioa funtsezkoa da Sanchez presidente izendatzeko. Tesuinguru horretan, bi alderdien arteko negoziazioak uste baino gehiago luzatu dira, batik bat,  Oriol Junquerasek eurodiputatu gisa duen immunitateari buruz Europar Batasuneko Justizia Auzitegiak emandako epaiagatik.

Azkenik, Kongresuko presidenteak, inbestidura-saioak deitzeko ahalmena duenak, hautagai sozialistaren inbestidura eztabaida urtarrilaren 4an, 5ean eta 7an egitea erabaki du. Izan ere, aurreikusi daitekeenez, Sanchezek ez du lehen itzulian inbestitua izateko behar duen gehiengo osoa (176 boto) lortuko.

Kongresuko Presidentetzako iturriek jakitera eman dutenez, hautagai sozialistaren inbestidura eztabaida zein egunetan egingo duten jakinarazi die jada Batetek talde parlamentarioetako ordezkariei, eta, deialdi formala, ostegun honetan, urtarrilak 2, egingo dute.

Larunbatean, Casado eta Abascalen txanda

Inbestidura-saioetan ohikoa izaten ari denez, eztabaida larunbatean, urtarrilak 4, hasiko da, presidente izateko Espainiako erregeak Kongresuaren presidenteari proposatutako hautagaiaren irakurketarekin. Hortik aurrera, hautagaiaren txanda izango da, eta bere gobernu programaren gako nagusiak azalduko dizkie diputatuei, horretarako denbora mugarik gabe.

Ondoren, Kongresuan ordezkatuta dauden talde parlamentarioen txanda izango da, eta, ordezkari gehien dituztenetik hasita hartuko dute hitza bozeramaileek. Hala, hautagai sozialistaz gain, larunbatean ondorengo diputatuek hitz egingo dute: Pablo Casadok (PP), Santiago Abascalek (Vox), Pablo Iglesiasek (Unidas Podemos) eta Gabriel Rufianek (ERC).

Bestalde, Ines Arrimadasek (Ciudadanos), Aitor Estebanek (EAJ), Mertxe Aizpuruak (EH Bildu), eta Talde Pluraleko -Junts, MasPais-Equo, Coalicion Canaria, Nueva Canarias, Compromis, Bloque Nacionalista Galego (BNG), Partido Regionalista de Cantabria (PRC) eta Teruel Existe- eta Talde Mixtoko –UPN, Foro Asturias eta CUP- ordezkariek baliteke igandean hitz egitea.

Inbestidura eztabaida igandean amaituko da, urtarrilaren 5ean, Errege bezperan, Sanchezek talde guztiei erantzun eta diputatuek botoa eman ostean, bata bestearen atzetik, euren izena esaten dutenean. Hautagai sozialistari babesa ematen dioten edo ez esan beharko dute.

Testuinguru horretan, Sanchezek Unidos Podemosen (35), EAJren (6), Mas Paisen (2) eta PRCko (1) ordezkarien babesa du bermatuta, baina 164 boto horiek ez dira nahikoa igandeko lehen bozketa horretan presidente izendatua izateko, gehiengo osoa lortzeko 12 boto gehiago behar dituelako.

Gauzak horrela, Sanchezek 48 ordu itxaron beharko ditu, hau da, urtarrilaren 7ra arte, lehen saiakeran behar den gehiengo osoa (176 diputatu) lortzen ez badu.

ERCren abstentzioa, beharrezkoa

Saio horretan, presidente izendatzeko aukera gehiago izango ditu Sanchezek, bigarren itzulian aldeko boto gehiago behar baititu aurka baino. Kasu horretan, ERCko (13 eserleku) eta EH Bilduko (5) diputatuen abstentzioak 150 boto dituen eskuineko blokeari (PP, Ciudadanos eta Vox) irabaztea ziurtatuko luke, eta horiei Juntseko zortzi diputatuak, CUPeko biak, UPNko beste hirurak eta Foro Asturiasekoak batuko litzaizkieke.

Ildo horretatik, ERCren Kontseilu Nazionalak ostegun honetan erabakiko du zuzendaritzak PSOErekin lortutako akordioa babesten duen ala ez. ERCren iritziz, itun horrek Kataluniako gatazka bideratzeko "bide politikoa aktibatzea" ahalbidetuko luke.

Halaber, urtarrilaren 2tik 3ra bitartean, buruzagi sozialistaren inbestiduran abstenitzeko proposamena egingo die EH Bilduk bere militanteei. Izan ere, koalizio abertzalearen esanetan, "PSOE eta Unidas Podemosen arteko koalizio-gobernua Espainian eratzea ahalbidetuz, egungo egiturazko arazo larriak konpontzeko aukera zabaltzen da".

Oraindik ikusteke dago zer egingo duten Compromis, BNG, Teruel Existe, Coalicion Canaria eta Nueva Canarias alderdietako diputatuek, bere garaian Sanchezen inbestidura ahalbidetuko zutela esan baitzuten.

Bigarren saio horretan, hautagai sozialistak hamar minutu izango ditu Kongresuko diputatuen babesa eskatzeko, eta, talde parlamentarioetako ordezkariek, bost minutu izango dituzte erantzuteko.

Eztabaida amaitutakoan, bigarren bozketa hasiko da, eta hautagaiari gehiengo soila (baiezkoak ezezkoak baino gehiago) nahikoa izango zaio. Hala, ERCren abstentzioari esker Sanchez presidente izendatuko dutela dirudi.

Sanchezen hirugarren ahalegina

PSOEk bere Batzorde Exekutibo Federala deitu du ostiralerako, urtarrilaren 3rako, inbestidurari begira ERCrekin lortutako akordioaren berri eman eta berresteko, iturri sozialistek jakitera eman dutenez.

Pedro Sanchezen hirugarren inbestidura eztabaida izango da hori, 2016ko martxoan Gobernuko presidente izaten saiatu baitzen, baina ez zuen arrakastarik izan, eta uztailean, ez zuenez akordioa lortu Unidos Podemosekin, hauteskundeak deitu zituen.

Hau zure interesekoa bada, baliteke beste gai hauek ere izatea
Diputatuen Kongresua Politika PSOE Espainiako Gobernua Espainia Alderdi politikoak Pedro Sánchez Eguneko albisteak Albisteak