Itxi

2020/01/03

20:46

Politika

Katalunia

Hauteskunde Batzordeak eurodiputatu akta ukatu dio Junquerasi

AGENCIAS | REDACCIÓN

Europar Batasuneko Justiziak Junquerasen immunitatea aitortu zuen arren erabaki du Espainiako Hauteskunde Batzordeak ERCko buruaren aurka egitea.

  • Oriol Junqueras,'proces' auziko epaiketan. Argazkia: EFE

    Oriol Junqueras,'proces' auziko epaiketan. Argazkia: EFE

  • Whatsapp
  • Whatsapp
  • Telegram
  • Bidali

Espainiako Hauteskunde Batzordeak eurodiputatu akta ukatu dio Oriol Junqueras Kataluniako Generalitateko presidenteorde ohi eta ERCko buruari, Europar Batasuneko Justiziak haren immunitatea aitortu badu ere.

Gaur egindako bileran, Hauteskunde Batzordeak erabaki du Junquerasek ezin duela eurodiputatu izan, argudiatuta Hauteskunde Legeak galarazi egiten diela hautetsi izatea epai irmo batengatik preso daudenei.

Duela bi aste, Europar Batasuneko Justizia Auzitegiak ebatzi zuen Junquerasek maiatzeko hauteskundeen ostetik bertatik izan behar zuela eurodiputatu, eta, gainera, immunitatea duela harrezkero.

Espainiako Hauteskunde Batzordeak aldeko zazpi botoengatik eta kontrako bostengatik hartu du erabakia, Pedro Sanchez hautagai sozialistaren inbestidura saioari hasiera emateko ordu gutxira; haren hautagaitza urtarrilaren 7an aterako da aurrera, besteak beste, ERCko 13 diputatuen abstentzioari esker.

Erabakiari buruzko idazkian, Espainiako Hauteskunde Batzordeak adierazi du Junquerasen kasuan bidezkoa dela Hauteskunde Araubide Orokorraren Lege Organikoak jasotako hautaezintasun-kausa betetzea, Auzitegi Gorenak epai irmoan 13 urteko espetxe-zigorra ezarri baitzion.

Horrela, erakundeak Europako Parlamentuko diputatu izaera bertan behera uzten du, "akordioaren datatik aurrera bere agintaldia baliogabetuz".

Espainiako Hauteskunde Batzordeak adierazi duenez, Jordi Solek bete beharko du eurodiputatu kargua, Europako zerrendaren hurrengoa delako. Ebazpen hori Auzitegi Gorenean helegitea aurkeztu ahal izango da, eta Europako Parlamentuko presidenteari jakinaraziko zaio.

Bere erabakiarekin, hauteskunde prozesuen gardentasuna eta neutraltasuna zaintzeaz arduratzen den erakundeak baietsi egin ditu PPk, Ciudadanosek eta Voxek ERCko buruari egiaztapenik ez emateko eskatuz aurkeztutako idazkiak.

Behin-behineko espetxealdian eta 'Proces' epaiketa betean zegoela, Junquerasek Europako hauteskundeetan eserlekua lortu zuen maiatzean, baina Espainiako Hauteskunde Batzordeak ezin izan zion egiaztapenik eman ekainean, Gorenak Espainiako legediak eskatzen duen izapidea betetzeko baimena ukatu ziolako, hau da, Batzordearen aurrean Konstituzioari zin egitea edo hitzematea.

Gorenak egin zion kontsultaren aurrean, Europar Batasuneko Justizia Auzitegiak eman berri duen epaiak gauzak aldatu zituen, izan ere, Europar Batasuneko erakundeak uste baitu eurodiputatua hautatua izan zenetik dela jada eurodiputatua, eta inongo izapide nazionalek ezin dutela eserlekua lortzea baldintzatu.

Auzitegi Gorena epaia nola aplikatu aztertzen ari zen bitartean, PPk eta Ciudadanosek berehala eskatu zioten Espainiako Hauteskunde Batzordeari Junquerasi egiaztapenik ez ematea, jada ez delako epaiketaren zain dagoen preso bat, baizik eta gaitasun-gabetzera kondenatutako epai irmo bat.

  • Bisitatuena

      Kargatzen ikusiena
      Kargatzen ikusiena
    ;