Politika -
Zentsura mozioa
Koldo Leoz, EH Bildukoa, Lizarrako alkatea da berriz
EH Bilduren hautagaiak gaur arte Gonzalo Fuentesen (Navarra Suma) esku zegoen alkatetza hartu du, NA+ eta PSNren parte-hartzerik gabe udaletxean, aurrez aurre, egin duten osoko bilkura.
Agentziak | Erredakzioa
Koldo Leoz EH Bilduren hautagaia da gaurdanik, 2015etik 2019ra arteko epean bezala, Lizarrako alkatea, PSNko eta Navarra Sumako zinegotzien parte-hartzerik gabe ateak itxita egindako osoko bilkuran erabaki dutenez. Gaur arte, Gonzalo Fuentes azken alderdi horretako ordezkaria zen udalerriko alkatea.
Navarra Sumak osoko bilkuraren baldintzen aurka egin du, koronabirusak eragindako egoera gorabehera aurrez aurrekoa izan baita, baina horrek ez du espero zen emaitza aldatu: Leozek EH Bilduko sei zinegotzien, Geroa Baiko zinegotziaren eta babes honen ondorioz PSNtik kanporatu dituzten bi zinegotzien babesa izan du.
Kontrako botoak Navarra Sumaren zazpi zinegotzienak (azkenean, ez dira bertaratu "erantzukizunak eta konpromiso sozialak" aginduta, ohar batean esan dutenez) eta bere alderdiaren agindu ofizialei jarraitu dien PSNko beste zinegotziarenak ziren, baina azken hori ere ez da joan, nahiz eta, Navarra Sumakoak ez bezala, telematikoki parte hartzeko prest zen.
Mozio hau onartzeko akordioak jasotzen duenez, Koldo Leoz bi urtez izango da alkatea, eta Jorge Crespok, PSNtik kanporatutako sozialistetako batek, hartuko dio lekukoa legegintzaldiaren azken urtean.
Kargua hartutakoan, Leozek hitza hartu du: "Hiri honentzat garai berri eta on bat ireki dela esan nahi dut, lan piloa egitea eta horretara berehala jartzea eskatuko duena".
