Covite: 'Zer egin dezakegu biktimok borreroaren etxean?'

Euskadiko Terrorismoaren Biktimen Elkarteak (Covite) Juan Karlos Izagirre Donostiako alkatearen jarrera gogor kritikatu du, atzo udaletxean egin zuen ekitaldiaren bidez "bere irudia garbitu" nahi izan duelakoan, eta "mozorroa" kentzeko eskatu dio.

Covitek eta Gregorio Ordoñez Fundazioak uko egin zioten atzo Juan Karlos Izagirrek Donostiako udaletxean antolatutako ekitaldian parte hartzeari. Bertan egoteko gonbidapena jaso zutela eta, Covitek harridura azaldu du gaur argitaratu duen gutun batean: "Zer egin dezakegu biktimok borreroaren etxean?", galdetu dute. "Gurekin bat etorriko da esaterakoan bere boto-emaileetako askok eta askok ETAren metodoak eta helburuak babesten dituztela. Baina horretaz ohartu ez bada, berari boto eman ziotenen artean ''ETA hil itzazu'' oihukatzen zutenak daude", salatu dute gutunean. Coviteren ustez, horrelako gonbidapenen bitartez Juan Karlos Izagirrek "bere irudia garbitu eta demokrata itxura eman nahi du". "Bere zoritxarrerako, Historia ezin da berridatzi eta bere alderdiak mozorroa jantzi beharrean, Euskadik bizi izan duen eta egun bizi duen terrorean duen erantzukizuna bere gain hartu beharko luke", erantsi dute. Covitek nabarmendu duenez, elkarte honek ETAren, GALen eta Batallon Vasco Español taldearen biktimak biltzen ditu bere baitan, "beraz, euskal herritar guztiak hartzen ditugu kontuan eta ez dugu onartuko Bilduk guri demokrazia lezioak ematea", gaineratu du. Baldintzak

Covitek Juan Karlos Izagirreri eta, oro har, Bilduri zenbait baldintza ezarri dizkie, "biktimengana hurbildu nahi badute". Baldintzak hauek dira: "ETAren atentatu guztiak gaitzestea; ETAri armak uztea exijitzea eta ETAko kideei euren burua Justiziaren esku uztea eskatzea; eta terroristek kartzela-zigorra osorik bete behar dutela babestea". Bilduk baldintza horiek betez gero, Covitek edozein ekitalditara joateko gonbidapena onartuko lukeela adierazi dute.

Bilduk gonbidapena zabaldu du berriro

Axier Jaka Donostiako zinegotziak adierazi duenez, ETAren biktimak udaletxeko ekitaldira ez joatea errespetatzen du Bilduk, eta etorkizuneko ekitaldietara joateko gonbidapena zabaldu die berriro.