Itxi

Politika

Europako funtsak

EH Bilduk alderdien arteko adostasuna eskatu du Euskadi "inoren menpe ez egoteko"

AGENTZIAK | ERREDAKZIOA

Iriartek "herri gisa erantzutera" deitu du, eta Barrenak EBk ere krisia baliatzen duela "birzentralizatzeko" ohartarazi du.

  • Maddalen Iriarte

    Maddalen Iriarte. Irudia: EFE

Maddalen Iriarte EH Bilduko lehendakarigaiak "adostasun zabala" lortzeko deia egin die gainerako euskal alderdi politikoei, baita eragile ekonomiko eta sozialei ere, koronabirusaren krisiaren ostean Europako funtsen inguruan erabakitzeko ahalmena izan dezaten susperraldirako, finantza tresna horien negoziazioan "inoren menpe" egon behar ez izateko.

Iriartek, Pernando Barrena EH Bilduko eurodiputatuarekin batera, Europako Batzordeak Europako Parlamentuari planteatuko dion proposamena aztertu du. 750.000 milioi euroko berreskuratze-plan bat izango da, estatuen artean banatuko litzatekeena eta 500.000 milioiko transferentzia zuzenak eta 250.000 milioiko kredituak izango lituzkeena.

EH Bildurko lehendakarigaiak planaren "letra txikia irakurtzea"ren garrantzia azpimarratu du, zenbateko handia izan arren, "gabezia" batzuk dituelako. Gainera, koronabirusaren pandemiak eragingo duen krisi "sakona"ren aurrean, EAEk "herrialde gisa erantzun" behar duela azpimarratu du, baita berreraikuntzarako Europako funtsei dagokienez ere.

EAEk "erabaki" ahal izan behar duela Europako plan eta funtsen inguruan adierazi du Maddalen Iriartek, horien negoziazioa eta banaketa estatuetako gobernuei baitagokie. "Ezin gara funtsen kudeaketa hutsera mugatu", azpimarratu du.

Koalizio subiranistaren ordezkariak "adostasun zabala" lortzera gonbidatu ditu gainerako alderdi politikoak, baita eragile sozial eta ekonomikoak ere, egoera horri "herri gisa erantzuteko" eta EAEri erkidegoko funtsen inguruan erabaki ahal izateko ahalmena emateko.

Iriarteren ustez, garrantzitsua da EAEk ahalmen hori izatea ekarpen horiek gizarte-babesera, kalitatezko enplegura, industria-trantsiziora, digitalizaziora edo COVID-19aren krisiak planteatzen dituen beste "erronka handi" batzuetara bideratu ahal izateko.

Lehendakarigaiak deitoratu egin du batzuek ez dutela aurreko krisitik "ezer ikasi", eta Europar Batasunaren laguntzetan EAEk, Nafarroak eta Akitania Berriak osatzen duten euroeskualdea kontuan hartu beharko litzatekeela uste du.

Maddalen Iriartek "garai zailak" datozela ohartarazi du, eta administrazio publikoek diru sarrerak murriztuko dituztela. Hori dela eta, Europako funtsak "funtsezkoak" direla esan du erakundeek krisiari aurre egiteko beharrezko baliabideak izan ditzaten.

Bestalde, Barrenak Europako Batzordeak aurkeztutako planak "eragin positiboa izango du", aitortu du, eta "aurrekaririk gabeko urratsa" dela. Hala ere, planean aurreikusitako 750.000 euroak zenbait "baldintza"ren menpe egongo direla ohartarazi du, eta horiek bete ezean "arazoak" sor daitezkeela.

Planak funts horiek osasuna eta enplegua indartzeko neurrietara edo ingurumena babestera bideratu behar direla ezartzeak "itxura ona du", adierazi du eurodiputatuak.

  • Bisitatuena

      Kargatzen ikusiena
      Kargatzen ikusiena