Politika -
Presoak
Foro Sozialak dio "premiazkoa" dela ETAko presoak euskal kartzeletara hurbiltzea
Etxeratek ohartarazi zuen Espainiako espetxe batzuetan "murriztapen gehiago" daudela, komunikazioetan, koronabirusaren berragertzeengatik; Foro Sozialak kezka agertu du, horregatik.
Agentziak | Erredakzioa
Foro Sozial Iraunkorraren iritziz, "premiazkoa" da ETAko presoak urruntzeko politikari "amaiera ematea", eta, pandemiaren testuinguruan, "Eusko Jaurlaritzaren proposamena gauzatzea, hau da, euskal preso guztiak eta EAEn familia-sustraitzea duten preso guztiak Euskadiko kartzeletara hurbiltzea".
Foro Sozialak, asteazken honetan, ohar bidez, adierazi du "kezka handiz" jaso duela Etxerat ETAko presoen senideen elkarteak aurreko astean egindako ohartarazpena; izan ere, Etxeratek salatu zuen Espainiako espetxe batzuetan "murriztapen gehiago" daudela, komunikazioetan, koronabirusaren berragertzeengatik.
Foro Sozial Iraunkorraren esanetan, "zentzuzkoa" litzateke Espainiako Gobernuak alde batera uztea "gatibutasun-hastapen bati erantzuten dioten politika horiek, kontuan izanik iragana gaindituta dagoela"; halaber, eskatu dio ETAko presoen urruntzea amaitzea.
Nafarroako Gobernuari, halaber, eskatu dio Eusko Jaurlaritzarena bezalako plana proposatzea; Jaurlaritzak eskatzen zuen euskal preso guztiak EAEra hurbiltzea, ETAkoak zein gainerakoak.
