Jauregui: 'ETAk estaldura bat bilatzen du bere amaiera justifikatzeko'

Ramon Jauregui Presidentetzako ministroaren hitzetan, astelehen honetan Donostian izango den Nazioarteko Bake Konferentzian ETA "estaldura bat bilatzen ari da bere amaiera justifikatzeko".

Onda Cero katean Jaureguik azpimarratu duenez, "garrantzitsua da demokraziak ETA garaitu duela", eta Espainiako Gobernua Donostiako konferentziatik kanpo egon dela beti azaldu du.

Horren esanetan, konferentzian parte hartuko dutenek indarkeriaren behin betiko amaiera eskatuko "omen" duen "paper bat sinatuko dute ziur aski". "Litekeena da" ETA "mota horretako estaldura bat bilatzen aritzea horrelako iragarpen bat egiteko", gaineratu du.

Ministroak azaldu duenez, "uste denez, azkenean, ETA amaieran egon daiteke" eta garrantzitsua da indarkeria horren oinarriak argi egotea: demokraziak organizazio terrorista garaitu duela eta "ez dela prezio politikorik izan bakearen truke, ez inor hiltzeagatik ez hiltzeari uzteagatik".

ETAren amaieraren inguruan "beste kontaketa bat egin nahi dutenen aurrean", terrorismoaren biktimak goraipatu ditu, "gezurraren aurrean irmo agertuko diren lekukoak baitira".

"Konferentzia honen emaitzen inguruan" ez PSOEk eta "are gutxiago Gobernuak" ezker abertzalearekin ez dutela "inolako harremanik" izan adierazi ostean, PSE-EEko bi ordezkarik (Jesus Eguiguren presidentea eta Carlos Totorika Ermuko alkatea) bertan parte hartzea "bidezkoa" dela esan du Jaureguik; "inolako zalantzarik ez duten bi pertsona dira", azaldu du.

"Euskadiko PPk erabaki berdina hartu izana gustatuko zitzaidakeen", gaineratu du.