Rajoy: 'ETA behin betiko desagertzen denean lasai egongo gara'

ETAren adierazpena "albiste ona" dela esan du gaur Mariano Rajoy PPko buruak, "indarkeriaz, xantaiaz eta heriotzaz baliatuz bere egitasmo politikoa inposatzeari utzi egingo diolako".

Hala ere, espainiar hiritarren lasaitasuna "ez da osoa izango", bere ustez, ETA "behin betiko desagertzen ez den arte".

"Oso pauso garrantzitsua da, baina espainiarrak ez dira erabat lasai biziko ETA behin betiko desagertzen ez den arte", esan du oposizioko buruak.

Zuzenbide Estatuaren "indarrak" ETA garaitu egin duela nabarmendu du Mariano Rajoyk.

Agerraldiak egin aurretik, Rajoyk eta Zapaterok solasaldia egin dute, ETAren adierazpenaren inguruan hitz egiteko.