PSOEko kideek alderdia zuzentzeko eskatu zioten lehendakariari

Jose Antonio Pastor PSE-EEren bozeramaileak jakinarazi du PSOEko zenbait kidek alderdia zuzentzeko eskatu diotela Patxi Lopez lehendakari eta PSE-EEren idazkari nagusiari, baina lehendakariak ez omen du horretarako inolako asmorik.

Radio Euskadin egin dioten elkarrizketa batean azaldu duenez, PSOEko kideek "alderdiaren buruzagitza hartzeko" eskatu diote lehendakariari. "Duela asko hasi ziren eskari hori egiten", gaineratu du.

Pastorren esanetan, "Patxi Lopezek proiekzio handia du Espainian eta PSOEn, oso irudi positiboa du eta PSOEren buruzagi izateko gaitasuna".

Hori dela eta, asteartean, PSE-EEk egin zuen bileraren ondoren, lehendakariak bere karguan jarraituko duela ziurtatuz "eztabaida itxi" nahi izan zuela esan du. "Argi dago lehendakariak eragin eta prestigio handia duela PSOEren baitan eta oinarrizko faktorea izango da otsailetik aurrera martxan jarriko dugun prozesu politikoan", adierazi du bozeramaile sozialistak.

Emaitza txarrak hauteskundeetan

Bestalde, PSE-EEren bozeramaileak hauteskunde orokorrez hitz egin du eta krisi ekonomikoari eta Gobernuaren kudeaketaren "irudi txarrari" egotzi dio emaitza txarren errua.