Itxi

Politika

katalunia

Arangonesek ez du nahikoa babes lortu lehen bozketan, JxCaten abstentzioa dela eta

agentziak | eitb media

ERCren eta CUPen 42 botoak ez dira nahikoa izan gehiengo osoa lortzeko.

  • Pere Aragones ERCren Generalitateko presidentegaia. Argazkia: Efe

    Pere Aragones ERCren Generalitateko presidentegaia. Argazkia: Efe

Pere Aragones ERCren Generalitateko presidentegaiak bere alderdiaren eta CUPen aldeko 42 boto besterik ez ditu jaso inbestidurarako lehenengo saioan, eta gehiengo osotik urrun geratu da, JxCatek abstentziora jo duelako eta PSCk, Voxek En Comu Podemosek, Ciudadanosek eta PPCk aurka bozkatu dutelako.

ERCren eta JxCat-en arteko tirabira agerian geratu da berriro Parlamentuan, oraingoan behe solairuko Auditorioan (hemizikloa baino zabalagoa eta aireztatuagoa 135 diputatuak hartzeko), inbestidura eztabaidan.

Bozketan -banan-banan, euren eserlekuetatik, diputatuek ozen iragarri dute euren botoa-, Aragonesek 42 babes (ERCren eta CUPen aldekoak), 61 aurkako boto (PSC, Vox, En Comu Podem, Ciudadanos eta PPC) eta 32 abstentzio (JxCat alderdikoak) jaso ditu.

Aragonesek JxCati egindako aipamenek ez dute balio izan "mesfidantzak" gainditzeko eta "amnistiaren eta autodeterminazioaren aldeko akordio nazionala" bultzatuko duen Gobernu bat osatzeko.

Kataluniako Gobernuko egungo kideen arteko bibrazio txarren lehen zantzua Aragonesen hitzaldiaren amaieran ikusi da; izan ere, ERCko 33 diputatuek zutik txalotu dute, JxCateko bankua eserlekuetan geldirik zegoen bitartean.

ERCren negoziatzeko moduarekin haserre, CUPekin akordioa lortzea lehenetsi duelako, JxCatek aurreratu du bigarren itzulian ere ezingo dutela Aragones inbestitu.

Horregatik, Albert Batet JxCat taldeko presidenteak bigarren bozketari uko egiteko eskatu dio Aragonesi, akordioa lortu arte.

"Gaurko bozketaren ostean, akordio on bat lortzeko borondate sendoarekin eta konpromiso politikoarekin inbestidurarako bigarren bozketari uko egiteko eskatzen diogu, 74 diputatu independentisten artean akordioa lortu arte", adierazi du.

Erantzunean, Aragonesek atea itxi dio bigarren itzulia atzeratzeko aukerari, ERCren eta JxCaten jarreren artean ez duelako "alde gaindiezinik" ikusten, eta "beharrezkoak ez diren atzerapenak" saihestu behar direlako eta Gobernu berria lehenbailehen eratu.

JxCatek azaldutako programa sozial eta ekonomikoa "ia osorik" partekatzen duela esan du Aragonesek, eta indar independentisten arteko koordinazio mekanismoak "hobetzea" eskaini du, Errepublikaren aldeko Kontseiluari aipamen eginez, eta Juntsen programa "osorik" onartzen duelako.

Gaurko bozketaren ostean, bi hilabeteko atzera-kontua aktibatu dute inbestidura saiatze aldera, eta lortzen ez badute, hauteskundeak automatikoki deituko dituzte uztailerako.

ERCren eta JxCaten arteko lehia alde batera utzita, Salvador Illa PSCko buruak "seny"a errezetatu dio Aragonesen alderdiari, eta otsailak 14ko emaitzek “konfrontazioan tematuta” dagoen independentismoaren alternatiba ezkertiar bat ahalbidetzen dutela defendatu du.

Jessica Albiach Parlamentuko komunen buruak adierazi duenez, JxCat Aragones "umiliatzen" ari da, eta ezkerreko alternatiba "leialtasunez" eta "labankadarik gabe" eraikitzeko deia egin dio.

Bestalde, osoko bilkuraren aurretik polemika izan da: Mahaiak, gehiengo independentistarekin, erabaki du (JxCaten abokatu Jaume Alonso-Cuevillasen abstentzioarekin) Belgikara ihes egin zuen Lluis Puig JxCateko diputatuaren boto delegatua onartzea, eta Ciudadanos, Vox eta PPCk iragarri dute Auzitegi Konstituzionalera eramango dutela gaia.

  • Bisitatuena

      Kargatzen ikusiena
      Kargatzen ikusiena