Politika -
Donostian
Gernikako Akordioak biktimen aitorpenerako ekitaldi bat egingo du gaur
Gernikako Akordioa sinatu zutenek ekitaldi bat egingo dute Donostian eta bertan ETAko biktimak aipatzen duen idatzi bat aurkeztuko dute.
Erredakzioa
Gernikako Akordioaren sinatzaileek (tartean, ezker abertzalea, EA, Alternatiba eta Aralar) "euskal gatazkaren biktima guztiak" aitortzen dituen idatzi bat aurkeztuko dute larunbat honetan Donostian. Idatzi horretan ETAko biktimei aipamen zehatza egingo zaie. Izan ere, ezker abertzaleak biktima hauek aitortzen dituen lehen aldia izango da.
Zentzu honetan, aitorpena "argia eta garbia" izango da eta "urrats garrantzitsua" izango da. Halaber, idatzi honek "abusu polizialek" eta GAL taldeak eragindako biktimak ere hartuko ditu.
Aurkezpena ekitaldi publiko batean izango da, Donostiako Bakearen Etxean, Bake-konferentzia egin zuten leku berean, hain zuzen.
Idatzia 2010eko irailaren 25ean sinatutako akordioko puntu batzuen garapena da. Batasuna, EA, Alternatiba eta Aralarrez gain, ETAko presoen kolektiboak ere bat egin zuen Gernikako Akordioaren adierazpenarekin.
Konkretuki, adierazpen hartan nabarmendu egiten zuten "gatazka politikoaren indarkeria mota guztiek eragindako biktimen aintzatespena, adiskidetzea eta ordaina" beharrezkoa zela.
