Lakuntza: "Espainiar Gobernuak hiru lan erreformak indargabetu behar ditu"

Asteartean, Mitxel Lakuntza ELAko idazkari nagusiak, Confederacion Intersindical Gallega eta Confederacion Sindical Catalanako ordezkariekin batera, lan erreformak indargabetzeko eskatuko dio Sanchezen Gobernuari, Madrilen.

2010, 2011 eta 2012ko erreformak bertan behera uztea eskatuko dute hiru sindikatuetako kideek, Lakuntzak berak "Radio Euskadi"ko elkarrizketa batean azaldu duenez. Lana arautzen duten legeek kaleratzeak errazten dituztela salatu du ELAko idazkari nagusiak, eta Tubacex eta H&M enpresak aipatu ditu.

Batetik, Lakuntzak deitoratu du ez dutela izan Yolanda Diazekin, espainiar Gobernuko Lan ministroa, egoteko paradarik, kargua hartu zueneko protokolo bileratik haratago. Ildo beretik, salatu du Iñigo Urkullu lehendakariekin duela bi hilabete finkatu zutela hitzordua, erreforma fiskalari buruz hitz egiteko, eta oraindik ez dutela erantzunik jaso. Hala, Eusko Jaurlaritzak eskubide sindikalak arazo gisa interpretatzen dituela azaldu du Mitxel Lakuntzak, Exekutiboaren pandemiaren kudeaketa kritikatu ostean.

Beste alde batetik, ELAren ordezkaria euskal industriaren egoera kritikoaz aritu da, enpresen itxierak eta langileen kaleratzeak salatuz. Euskaltelen kasua aipatuta, Jaurlaritzak enpresa handiak joaten utzi dituela salatu du. Gainera, Lakuntzak azaldu du beharrezkoa dela enpresen eraldaketa energetikoa eta digitala bermatuko dituen funtsa sortzea.

Azkenik, ELAren idazkari nagusiak mobilizazioak iragarri ditu udazkenerako, eta ez du baztertu greba orokorra deitzea.