Politika -
Fragaren heriotza
Manuel Fragaren hileta arratsaldean izango da Perbesen (A Coruña)
Fragak Madrilen zuen etxeko atarian jende asko pilatu da goizean goizetik eta hilkutxa atera dutenean 'Gora don Manuel' eta 'Gora Espainia' oihukatzen hasi dira.
Erredakzioa
Manuel Fragaren gorpua goizeko 10:00ak aldera atera dute Madrilen zuen etxetik A Coruñako Perbes herrira eramateko; izan ere, bertan hobiratuko dute, arratsaldean hileta-elizkizuna egin ostean. Etxeko atarian jende asko zain zegoen eta hilkutxa atera dutenean 'Gora don Manuel' eta 'Gora Espainia' oihukatzen hasi dira.
Fragaren lau semeak arduratuko dira hilotza Galiziara eramateaz. Alaba dagoeneko Perbesen da, Fragaren iloba guztiekin batera. Goizean, bidaiari ekin aurretik, Alberto Ruiz Gallardon Justizia ministroa izan da Fragaren hil-kaperan.
Mariano Rajoy ez da hiletan izango, Herman Van Rompuy Europako Kontseiluko presidentearekin bilera daukalako eguerdian eta arratsaldean Antonio Tajani Europako Kontseiluko presidenteorde eta Industria komisarioarekin beste batzar bat hitzartuta duelako.
Bestalde, datorren larunbatean Manuel Fragaren aldeko beste hileta-elizkizun bat egingo dute Santiagoko Katedralean.
