ETAren amaieraz 'denekin' hitz egin nahi duela erantzun dio EAJk PPri

Iñigo Urkullu EAJren presidenteak begi onez ikusi du Antonio Basagoiti PPren EAEko presidentearen proposamena, ETAren amaieraren aurrean EAJrekin eta PSErekin batera prozesuaren buru izatea. Hala ere, EAJk nahiago omen du "denekin" hitz egin, EAJ, PP eta PSEra mugatu beharrean.

Urkullu, Bizkaia Irratian egin dioten elkarrizketa batean, gustura agertu da PPren proposamenarekin "PPk ETAren amaieraren testuinguruan gaudela" onartu duelako. Hala ere, "horren aurrean, elkarlanean aritu ala ez" ikusteke dagoela zehaztu du.

Hori horrela, Basagoitiren proposamenak eta helburuak zeintzuk diren "ikusi beharko" dela azaldu du. Urkulluk azaldu duenez, EAJn "argi dugu bakea eraikitzeke dagoela, luzea izango dela, eta bake zantzuak badaude ere, egunero ibili beharreko bidea dagoela, baita elkarbizitza alorrean ere".

"PP txostena prestatzen ari dela dirudi, eta ondo ikusten dut PPk ETAren amaieraren testuinguruan gaudela onartzea. Batekin eta bestearekin hitz egin behar dugu, eta PPk PSE-EErekin eta gurekin hitz egin nahi badu, ederki, baina guk nahiago dugu denekin hitz egin", azaldu du Urkulluk.