Politika -
Proposamena
Eguigurenek euskal Konstituzio 'propio' bat sortzea proposatu du
PSE-EEko presidenteak "posible" ikusten du "Euskal Herri ez independentea" sortzea, eta Gernikako Estatutuak ez duela gatazka konpontzen ohartarazi du.
Erredakzioa
Buruzagi sozialistaren hitzetan, Konstituzio horrek "posible" egin beharko luke "Euskal Herria batasun politiko gisa sortzea", "Frantziatik eta Espainiatik independente izan gabe", eta "Nafarroarekin organo bateratuak izanda".
Bilbon Ekonomia Berria Foroan eskainitako hitzaldi batean, Eguigurenek ohartarazi du Gernikako Estatutua erreformatzeak ez duela "konponduko" euskal "gatazka", arazoa "antzinetik" baitator eta ez baita konpondu iraganeko Konstituzioetan. "Orain, Euskadik badauka erabakitzeko eskubidea izateko tartea, independente izatea erabakiko balu ere".
Eguigurenek uste du ETAk indarkeria utzi eta gero lehentasuna "bakea errotzea" dela, baina ondoren Euskadin bere etorkizuna aztertu ahal izango duela, betiere "adostasuna bilatuta".
PSE-PP harremana
Bestalde, EAEko sozialisten presidenteak ohartarazi du Mariano Rajoyren Gobernuak bakegintzaren "aurkako" jarrera agertzen badu, PSE-EEk harremana hautsi egin beharko duela PPrekin.
Eguigurenek Jorge Fernandez Diaz Barne ministroaren hitzak ere hartu ditu hizpide. Hori horrela, kritikatu egin du ministroak iragarri izana ETA desagertuz gero baino ez dizkietela kartzela onurak emango presoei: "Modu txarra da gaiari heltzeko".
"Denok egiten ditugu akatsak, baina hori bada ETAren gaiari heltzeko asmoa, aukera txarrena izango da", esan du.
