UPyD: 'Lehendakaria Otegi espetxeratzearen aurka azaltzea, ulertezina'

Rosa Diez UPyDko buruzagiarentzat ulertezina da lehendakariak "gizartearen nahia" aipatzea Arnaldo Otegi espetxetik ateratzearen alde azaltzeko.

Rosa Diez UPyDko buruzagiarentzat "izugarria" eta "demokraziarentzat ulertezina" da Patxi Lopez lehendakariak legea aipatu beharrean, "gizartearen nahia" aipatzea Arnaldo Otegi espetxetik ateratzeko eskaera defendatzeko.

Lehendakariak Gara egunkarian egindako elkarrizketaren inguruan mintzatu da Diez, izan ere, bertan Otegiren kartzelatzea "euskal gizartearen nahiaren aurkakoa" dela esan zuen.

"Otegi auzitegi batek horrela epaitu duelako dago espetxean", azpimarratu du UPyDko buruzagiak, eta legediaren eta demokraziaren aurrean, lehendakariak ezin dituela "euskaldunen sentimenduak" aipatu ohartarazi du, "are gehiago, euskal gizartearen iritziak era askotarikoak direnean".

Bestalde, Iñaki Oyarzabal EAEko PPren idazkari orokorraren adierazpenak kritikatu ditu, Diezi "fidatzekoa ez izatea" eta ETAren indarkeriaren amaierarekin "interes politikoak" bilatzea egozteagatik.

"Gu iraintzen denborarik ez galtzeko eskatu nahi diet, horrelako gauzek ez gaituztelako isilaraziko", esan du Diezek. PPk aurretik inoiz ez ziela horrelako kritikarik egin azpimarratu du, "agian horrelako gauzak orain arte eurei esaten zizkietelako".

Gainera, bere alderdiak Gobernuari egindako Bilduren eta Amaiurren ilegalizaziorako eskaera defendatu du, "nahikoa seinale daudelako bi alderdiek ETAren ekintzak legitimatzen dituztela".