Gorenak baliogabetu egin du Arkaitz Goikoetxearen absoluzioa

Auzitegi Gorenak baliogabetu egin du Arkaitz Goikoetxea ETAko kidearen absoluzioa, eta 3 urteko espetxe zigorra ezarri dio, Benjamin Atutxa Eibarreko (Gipuzkoa) zinegotzi sozialista bahitzen saiatzea egotzita.

Gorenak onartu egin du Ministerio Fiskalak absoluzioaren aurka aurkeztutako helegitea, eta legez kanpoko atxiloketa terrorista delitua egiteko konspiratu izana leporatu dio Goikoetxeari.

Auzitegi Nazionalak duela urtebete absolbitu zuen ETAren 'Bizkaia' komandoko burua. Izan ere, Benjamin Atutxa bahitzeko lehen urratsak egin bazituen ere, azkenean amore eman zuela ondorioztatu zuen.

Epaiketan erakutsitako bideo batean, Goikoetxeak aitortu egin zion Baltasar Garzon Auzitegi Nazionaleko epaile ohiari Garikoitz Aspiazu Rubina 'Txeroki'k zinegotzia "bahitzea eta exekutatzea" agindu ziola.

Auzitegi Nazionalaren epaiaren arabera, Goikoetxeak bahiketa egiteko prestaketak hasi zituen (lasaigarriak lortu zituen eta Errioxako Pazuengos mendian zulo bat eraikitzea pentsatu zuen), baina azkenean uko egin zion gauzatzeari, zinegotziak bizkartzainak zituelako.