Politika -
Zuzenketa eskatu dute
'Hitz-jarioa' kontrolatzea eskatu dio PSEk Basagoitiri
Urkulluk ere esandakoa berehala zuzentzea eskatu dio Euskadiko PPko presidenteari. Lehendakariak Homer Simpsonek baino titulu gutxiago dituela esan du Basagoitik.
Erredakzioa
Patxi Lopez lehendakaria Homer Simpson marrazki bizidunetako pertsonaiarekin konparatuz Basagoitik asteazken honetan egin dituen adierazpenen aurrean, 'hitz-jarioa' kontrolatzea eskatu dio PSE-EEk Euskadiko PPko presidenteari.
"Homer Simpson baino titulu gutxiago dituen euskal erakunde bateko goi ordezkari batek" Mariano Rajoyren Gobernuak hartutako erabaki ekonomikoak kritikatzea egotzi dio Antonio Basagoiti EAEko PPko presidenteak Patxi Lopez lehendakariari.
Jose Antonio Pastor sozialisten bozeramailearen ustez, arreta desbideratzeko helburua dute adierazpenok. ''Rajoyren Gobernuak martxan duen murrizketa politika basatitik desbideratu nahi izan du arreta, gutxienezko errespetua zor dion kargudun instituzional baten aurka estilo txarreko irainak erabiliz'', esan du.
Pastorrek zuhurtasunaren aldeko deia egin du, eta adierazpenak zuzentzeko eskatu dio Basagoitiri.
Urkulluk ere zuzentzea eskatu dio
Iñigo Urkullu EAJren Euskadi Buru Batzarreko buruak ere adierazpenak ''berehala zuzentzea'' eskatu dio Basagoitiri, lehendakariaren irudiaren aurrean agertu duen ''errespetu faltagatik''.
