Politika -
frantziako hauteskundeak
Frantziako presidentetzarako hauteskundeak, bost gakotan
Frantziako presidentetzarako hauteskundeetan, Emmanuel Macron eta Marine Le Pen neurtuko dituen bigarren itzuliak bost zalantza handi argitu beharko ditu igande honetan.
agentziak | eitb media
Abstentzioa, ezkerraren botoa, ultraeskuinari osasun kordoia edota uneko presidenteak eragiten duen gaitzespena. Frantziako presidentetzarako hauteskundeetan, Emmanuel Macron eta Marine Le Pen neurtuko dituen bigarren itzuliak bost zalantza handi argitu beharko ditu igande honetan.
1) Abstentzioa
Apirilaren 10eko lehen itzulian, abstentzioa handiena izan zen 2002tik. Hautagaiekin guztiz bat ez datorren hautesle kopurua dela eta, bigarren itzuli honetan izango den parte-hartze maila da zalantza nagusietako bat.
2) Ezkerra
Lehen itzulian ezkerreko hautagaien alde egin zuten boto-emaileen mobilizazioa edo mobilizazio eza ere faktore garrantzitsua izan daiteke. Berriz saiatuko al dira eskuin muturra geldiarazten, ala Le Penen aldeko boto inkonformista emango al dute antisistemek?
3) Sabai ultra
Marine Le Penen alderdiak lehen aldiz apurtu dezake, alde handiarekin, bere hauteskunde sabaia. Noraino iritsiko da? Non dauka muga?
4) Osasun kordoia
Orain arte, frantziar alderdiek errespetatu egin dute ultraeskuinari botere politikorako kuotetara iristea ia erabat galarazi dion osasun kordoia. Bigarren itzuli honetan, fronte hori urratuta dago. Horren amaieraren hasiera al da?
5) Macronen aurkako frontea
Ezker-eskuin zatiketa tradizionaletik harago, uneko frantziar presidenteak gaitzespen nabarmena eragiten du herritargoaren zati handi batengan. Zenbat boto-emailerengan izango du horrek Le Penen ultraeskuineko etiketak baino eragin gehiago?