Politika -
Auzitegi Konstituzionala
Sorturen inguruko ebazpena beste bi aste atzeratuko da gutxienez
Konstituzionalak gaur ere ez du gaia jorratu eta babes helegitea aztertzeko saioa gutxienez 10 egun atzeratuko da, datorren asterako ez baitago bilerarik aurreikusita.
Erredakzioa
Gaur amaitu da Auzitegi Konstituzionalak asteartean hasi zuen osoko-bilkura eta azkenean ez dute Sortuk aurkeztutako helegitea eztabaidatu, iturri judizialek jakitera eman duenez. Auzitegi Gorenak alderdi politikoen erregistroan sartzea debekatu zion Sorturi eta horren kontrako babes helegitea aurkeztu zuen alderdi abertzaleak Konstituzionalean.
Auzitegi Konstituzionalaren hurrengo osoko bilkura ekainaren 5etik 7ra izango da, baina ez da ziurra gai-ordenean Elisa Perez Veraz epaileak Sorturen helegitearen inguruan idatzitako txostenean egotea.
Sorturena aste honetako gai-ordenean zegoen. Gainera, osokoak Elisa Perez Vera epailearen txostena du, Auzitegi Gorenaren irizpidearen kontra, Sortu legeztatzearen alde dagoena.
Defentsak helegitea aurkeztu zuenetik urtebete igaro da eta legalizazioaren aldeko ahotsak ugaritu egin dira. Hala ere, eztabaidak Bildurekin sortutakoak baino zailagoa dirudi, koalizioak Konstituzionalaren iragazkia pasa baitzuen aldeko sei botorekin eta kontrako bostekin.
