Politika -
BOTERE JUDIZIALA
Konstituzio Auzitegia berritzeko bildu da Botere Judizialaren Kontseilu Nagusia, akordiorako aukera gutxirekin
Itxura guztien arabera, bilerak prozedura finkatzeko balioko du, hautagaiei buruzko akordiorik lortu gabe, eta horrek zaildu egingo luke Gobernuak bultzatutako azken erreformak ezarritako irailaren 13ko epemuga betetzea.
A. S. | EITB MEDIA
Botere Judizialeren Kontseilu Nagusiak bilera du ordu honetan, Carlos Lesmes Auzitegi Goreneko eta epaileen aginte nagusiko presidenteak, Pedro Sanchezi eta Alberto Nuñez Feijoori premiaz bildu eta epaileen aginte nagusia berritzeko akordioa ixteko exigitu eta biharamunean.
Akordiorik ezean, atea zabaldu dio dimisioa aurkezteko aukerari, eta Legea aldatzeko beharra aldarrikatu du, epaileak izan daitezen epaileak aukeratzen dituztenak. Bi aldeek baina, aurrez aurre jarraitzen dute.
Testuinguru horretan, badirudi bilera baliagarria izango dela prozedura finkatzeko, hautagaiei buruzko akordiorik lortu gabe, eta horrek zaildu egingo luke Gobernuak bultzatutako azken erreformak ezarritako irailaren 13ko epemuga betetzea.
Lesmesek uztailean deitu zuen Osoko Bilkura, eta gaur egun osatzen duten 18 kideei eskatu zien akordio bat lortzeko Botere Judizialaren Kontseilu Nagusiak proposatu behar dituen bi pertsonen inguruan, Auzitegi Kostutionaleko lau magistratuak ordezkatzeko, horien agintaldia ekainaren 12an amaitu baitzen.
Hiru urte eta sei hilabete baino gehiago daramatza jarduneko Botere Judizialaren Kontseilu Nagusiak, 2018ko abenduaren 4tik. Izan ere, bi indar parlamentario nagusien artean akordio bat lortzeko borondaterik ezak eutsi egiten dio arazoari. PSOEk eta PPk elkarren aurka jo dute beste behin eta alde bakoitzak besteari leporatzen dio berritzearen blokeoa.
Pilar Llop Justizia ministroak erronka bota dio Alberto Núñez Feijoo PPko buruzagiari, eta eskatu dio gaurko bileran Botere Judizialaren Kontseilu Nagusiko (BJKN) bokal izateko hautagaiak aurkezteko, 2018tik egiteke dagoen berritzea desblokeatze aldera. Ministroak, gainera, Carlos Lesmes presidentearen dimisio posiblearen errudun jo ditu popularrak.
Baina Genovako iturriek adierazi dute, uztailean helarazi ziotela Gobernuari euren proposamena; arazoa ez direla izenak, epaileen esperientzia eta independentzia irizpideak baizik.
Gaur, Botere Judizialaren Kontseilu Nagusia dagozkion Konstituzio Auzitegiko bi magistratuak izendatzeko bilduko da. Baina momentuz, ez dirudi agindua beteko dutenik. Eskumenak kendu dizkietela salatzeko, epaile kontserbadoreak izendapenak blokeatzeko prest leudeke, eta Gobernuak salatu du, alderdi popularra dagoela mugimendu honen atzean.
