Politika -
Udal hauteskundeak
Odon Elorzak Donostiako PSE-EEren primarioetan aurkezteko abalak lortu ditu
Alkate ohiak Marisol Garmendiarekin neurtuko ditu indarrak Gipuzkoako hiriburuko Udalerako hautagai sozialistaren barne bozketan.
M. D. | EITB Media
Odon Elorza Donostiako alkate ohiak Gipuzkoako hiriburuko PSE-EEren primarioetara aurkezteko beharrezko abalak lortu ditu. Handik aterako da hurrengo udal hauteskundeetako hautagaia.
Beraz, PSE-EEren hurrengo udal hauteskundeetarako hautagaia primarioetan erabakiko da. Kongresuko diputatu sozialistak Marisol Garmendiarekin neurtuko ditu indarrak.
Elorzak berak azaldu duenez, afiliatuen % 15en abala du, aurkez daitekeen gehienekoa, oraindik "antolaketa batzordearen baieztapena falta den" arren. "Eskerrik asko laguntza taldeari eta bere abala eman didatenei. Apaltasunez erabiliko ditut ideien eztabaida aberasteko", esan du Elorzak.
Primarioetako hautagaiak, gainera, PSE-EEren "barne demokraziaren ariketa" hori Donostiako gizartera "oso modu positiboan" proiektatuko dela esan du, "alderdiekiko desafekzioa" nagusi denean.