Andueza: "Oposizioak irudimen gehiago behar du izan, eta aurrekontuei zuzenketa onak egin"

Oposizioko alderdien "parte hartzea" eta aurrekontuen proiektuari ekarpenak egitea espero du Eneko Andueza PSE-EEko idazkari nagusiak, Radio Euskadiko "Crónica de Euskadi Fin de Semana" irratsaioan eskainitako elkarrizketan adierazi duenez. Horrela, "irudimen gehiago eta eztabaidatzea merezi duten zuzenketa erakargarriak" aurkezteko eskatu dio oposizioari. "Orain oposizioaren ordua da, ez Gobernuarena", ondorioztatu du Anduezak.

Bestalde, Anduezaren hitzetan, "berri ona da" Kupoaren Bost Urteko Legearen berritzea, iraungita zegoelako. Ez du uste gaurko portzentajea asko aldatuko duenik, bere ustez, egungo baldintzak "onak" baitira.

Deflaktazioa "auzi teknikoagoa da, ideologikoa baino" eta, gogoratu duenez, aurretik EAJren eta EH Bilduren Gobernuek ere PFEZren tarte batzuk deflaktatu zituzten. Dena dela, "progresiboagoak diren" beste neurrien alde egin du, eta horretan lanean dabiltzala iragarri du. "Datozen egunetan eta asteetan denbora izango dugu Gobernuetan horretaz eztabaidatzeko", esan du.

Errioxako Jatorri Izendapena Arautzen duen Kontseiluaren Osoko Bilkuraren erabakiaz galdetuta, PSEko idazkari nagusiak esan du nahiago dituela upeltegi guztiak Errioxa izendapenaren azpian. Ika-mika laster bukatzea espero du, eta arreta jartzea kalitatezko ardoen ekoizpenean.

Basurtuko Ospitalean izandako haurtxo baten bahiketaren harira, "akats txikia" izan dela adierazi du Anduezak, baina espero duela euskal ospitaleetako barne segurtasun protokoloak berrikuskatzea, "horrelakorik berriro gerta ez daitezen". Bukatzeko, ez du baztertzen protokoloak "birdoitu" behar izatea.