Politika
Bilera
Europako Funtsak hizpide hartuta bilduko dira gaur Iñigo Urkullu eta Nadia Calviño
EITB Media
Lehendakariak eskatutako premiazko bilera eguerdian egingo da, Ajuria Enean. Espainiatik agindutako kogobernantza betetzea eta Europako Funtsen inguruko erabakietan Jaurlaritzaren eta Aldundien parte-hartze handiagoa defendatuko ditu Urkulluk.
-
Urkullu eta Calviño Ajuria Enean, 2022ko otsailean. EITB Media.
Iñigo Urkullu lehendakariak eta Nadia Calviño Espainiako lehen presidenteordeak bilera egingo dute gaur Europako Next Generation Funtsen kudeaketari buruz aritzeko. Eguerdian bilduko dira Ajuria Enean.
Urkulluk premiazko bilera eskatu zion abenduan gutun bidez Calviñori, Europako Funtsen inguruko erabakietan Jaurlaritzak eta aldundiek parte har dezatela eskatzeko, eta horri erantzunez dator gaurko bilera.
Eusko Jaurlaritzak beharrezkotzat jotzen du euskal erakundeek Europako Funtsen kudeaketa prozesu guztian parte hartzea, baina orain arte hitzemandako kogobernantzarik ez dela izan iritzita, Urkulluk egoera aldatzeko premia adierazi zion Calviñori joan den urte amaieran, kezka eta kexa azaltzearekin batera.
Europako Funtsak zertarako eta nola kudeatu behar diren erabakitzea giltzarri da Jaurlaritzarentzat, "gizarteak dituen erronka nagusiei erantzuteko balio behar" dutelako, Bingen Zupiria Jaurlaritzako bozeramaileak esan duenez.
