Alonso: 'Zer da onena? Sendagaietan aurreztea edo medikuak murriztea?'

Sendagaietan aurreztea edo medikuak murriztea nahi duen galdetu dio Alfonso Alonso Arabako PPko presidenteak Eusko Jaurlaritzari. Halaber, Alonsok salatu duenez, Exekutiboak "murrizketak egin ditu osasun arloan jada". Alonsok komunikabideen aurrean egin du agerraldia, eta bertan, gaur indarrean sartu den sendagaien koordainketaren auzia izan du hizpide. Alderdi Popularreko kideak bere kezka azaldu du Eusko Jaurlaritzak une honetan erakutsi duen "lidergo faltagatik".

Eusko Jaurlaritzak "sendagaietan aurrezteari uko egin dio, baina, bitartean, murrizketak egin ditu osasun arloan, izan ere, lehen mailako arreta zerbitzuetan medikuak kendu ditu jada, eta asteburuetako pediatra kopurua ere murriztu du".

"Zer da onena? Sendagaietan aurreztea edo medikuak murriztea?", galdetu dio Exekutiboari, "aukeran, medikuetan baino, nik nahiago dut sendagaietan aurreztea".

"Herritarrek jakin behar dute, egungo baldintzen aurrean, dirua aurrezteko hartu beharreko neurriak direla", azpimarratu du Alonsok, "eta hau berdin gertatzen da Madrilen, Katalunian edo Euskadin, krisiak guztiongan eragina duelako".