Otegik 'ETAren egitura militarrak' desegitearen alde egin du

Arnaldo Otegi ezker abertzaleko buruzagiak "ETAren egitura militarrak desegitea"ren alde egin du, "bideak horra eraman behar gaituelako". Horren ustez, prozesua "nazioarteak" zuzendu beharko luke.

Batasuneko bozeramaile ohiak El tiempo de las luces elkarrizketa-liburuan egin du hausnarketa hori. Fermin Munarriz kazetariak idatzi du, eta Gara egunkariarekin batera banatuko dute, gaurtik.

Elkarrizketan, Otegik ezker abertzalea ETAren indarkeriatik aldentzeko prozesuaren zehaztasunak azaldu ditu.

"Egungo testuinguruan, koherentziagatik, ETAren egitura militarrak desegitea da nire gogo bakarra. Bideak horra eraman behar gaitu, ezbairik gabe, eta prozesua nazioarteak zuzendu beharko luke", adierazi du Otegik. Izan ere, "ekintza armatuak" amaitu eta gero, "hurrengo urratsa" "desarmea" dela iritzi dio: "Argi dago erabaki batek bestea dakarrela".

Liburuan, Otegik barkamena eskatu die ETAren biktimei ("ezker abertzaleko bozeramaile gisa, mina edo iraina areagotu badiet, barkamena eskatu nahi diet, bihotzez"), eta soilik bide baketsuen alde egiteko arrazoiak "etikoak zein politikoak" direla argudiatu du.

"Indarkeriaren aurrean izan dudan jarreraren eta agertu dudan arbuioaren bilakaera arrazoi etikoak eta politikoak direla medio etorri da", nabarmendu du.

Buruzagi abertzaleak ETAren biktimekin "elkarrizketa bideak" abiatzea proposatu du, "zuzenak edo zeharkakoak, publikoak edo pribatuak", betiere biktimak eurak ados badaude.

Liburuaren beste atal batean, Otegik babestu egin du ETAren mehatxuen ondorioz Euskaditik alde egin zutenek Euskadiko hauteskundeetan bozkatu ahal izatea, hori egiteko "eskubidea" dutela iritzita."Euskal Herritik ETAren mehatxuen ondorioz ihes egin zutela frogatu ahal badute, ez gaude horien bozkatzeko eskubidearen aurka, eskubide hori baitute. Salatzen duguna da, horiekin batera, hamarka mila kolonizatzaile sartu nahi dituztela, hauteskundeen emaitzak aldatzeko".

Gemma Zabaleta, ekitaldian

Liburua Donostian aurkeztu dute Munarrizek, Iñaki Soto Gara egunkariko zuzendariak eta Rufi Etxeberria buruzagi abertzaleak.

Ekitaldian, EH Bilduko ordezkari ugari ere izan dira, hala nola Laura Mintegi lehendakarigaia; Pello Urizar EAko idazkari nagusia; Xabier Mikel Errekondo Amaiurreko diputatua; eta Joseba Permach, Txelui Moreno eta Jone Goirizelaia ezker abertzaleko buruzagiak.

Gemma Zabaleta (PSE-EE) Eusko Jaurlaritzako Gizarte Gaietako sailburu eta Ahotsak plataformako kidea ere izan da bertan.