Rubalcaba: 'PSOEko organuek hala eskatzen badidate, dimitituko dut'

Alfredo Perez Rubalcaba PSOEko idazkari nagusiak ostegun honetan esan duenez, PSOEko zuzendaritzako organuek hala eskatuko balute, hark dimisioa aurkeztuko luke. "Nire alderdiko organuek esaten badidate 'Alfredo, horrek ez du funtzionatzen, dimisioa aurkeztu behar duzu', handik minutu batera hori egingo nuke", azaldu du SER irrati-katean eskainitako elkarrizketan.

Asteazkenean ildo berean hitz egin zuen Rubalcabak. "PSOEko Kongresu demokratiko eta autonomoak aukeratu nau, proiektu alternatibo baten bidez herritarren konfiantza berreskuratzeko, eta hori bete egingo dut", azpimarratu zuen.

"Alderdiko kideek hemen jarri naute eta horiek ere kendu ahal naute", azaldu du gaurko elkarrizketan, "ez da Alfredo Perez Rubalcabaren arazoa, PSOE osoarena baizik. Indarrik edo babesik gabe geratzen naizen egunean, dimisioa aurkeztuko dut, dudarik ez izan".