Politika -
Kataluniako hauteskundeak
Sabinak letra jarri dio Ciutadansen kanpainako Espainiako ereserkiari
Ereserki nazionala eta Joaquin Sabina kantautoreak idatzitako letra ditu ardatz alderdiaren hauteskunde kanpainako bideoak.
Erredakzioa
Espainiako ereserkia eta Joaquin Sabinak idatzitako letra Ciutadansen hauteskunde kanpainako bideoaren ardatzak dira. Albert River Kataluniako Generalitaterako hautagaiak egin du aurkezpena, astelehen honetan, Madrilen.
“Joaquin Sabinak jarri behar izan dizkio hitzak Espainiako ereserkiari, eta herritarrok jarriko dizkiegu hitzak geure herrialdea batzeko erreformei”, nabarmendu du Riverak. Gainera, “ereserkia ematea” eskertu dio musikariari.
Sabinaren testua, besteak beste, Albert Boadella antzerkigileak, Felix Ovejero ekonomialariak, Arcadi Espada eta Juan Carlos Girauta kazetariek eta Javier Nart abokatuak irakurri dute bideoan. Kantautoreak Interviu aldizkariko bere zutabean argitaratu du “Ereserki nazionalerako hitzen aurreproiektua (barkatu)" izenburupean.
“Herritarrak, ez heroiak ez bilauak. Iraganaren semeak, asko dago egiteko. Herritarrok, hain gizatiarrak errotik. Babeleko anaiaren herrikideak. Mendi altua, itsas portua ere baduena. Ez da askatasuna baino gauza sakratuagorik”, entzun daiteke Espainiako ereserki berrituan.
“Ciutadansek nahi dituen herritar askeak eta berdinak” ordezkatzen ditu bideoak; herrialdea erreformatzearen alde egin du, baina puskatu gabe, eta PPk, PSOEk eta alderdi separatistek sortutako “alderdikrazian” ez sinestea babestu du.
“Bigarren trantsizio politikoa egiteko garaia iritsi da, herritarren trantsizioa egiteko ordua heldu da, boterea herritarrei itzultzekoa”.
