Europako hauteskundeak 2019: maiatzaren 26ko hauteskundeei buruko albisteak | EITB Europako Parlamenturako hauteskundeak

Europakoak

11:39

Europakoak

M26

Europarrak bozkatzen hasi dira, zatikatuago ageriko den Euroganbera osatzeko

Agentziak | Erredakzioa

Herbehereek eta, paradoxikoki, martxoan 'brexita' gauzatu behar zuen Erresuma Batuak gaur, osteguna, abiatu dituzte hausteskundeak, Estatu gehienetan igandean egingo direnak.

  • Bas Eickhout

    Bas Eickhout Herbehereetako Berdeen hautagaia, Utrechten botoa ematen. Argazkia: Efe.

  • Whatsapp
  • Whatsapp
  • telegram
  • Bidali

Europarrak botoa ematera deituta daude, gaurtik hasi eta igandera arte, Europako Parlamentuak datozen bost urteetan zer osaera izango duen erabakitzeko, eta analistek erronka bizia aurreikusi dute gehiengo europazaleak osatu nahi dituzten taldeen eta eskuin muturreko eta Europaren aurkako agenda aurrera atera nahiko duten taldeen artean, zeinak agidanez indar handiz sartuko baitira legebiltzarrean.

Zita ostegunean hasi da, Erresuma Batuan eta Herbehereetan, nahiz eta EBko estatu gehienetan igandean egingo dituzten bozak. Theresa May, martxoan brexita gauzatu behar zuen lehen ministroa, izango da Europako hauteskunde hauetan botoa emango duen EBko lehen buruzagia, Mark Rutte herbeheretarrarekin batera.

Galdeketen arabera, Euroganbera oso zatikatuta osatuko dute boto-emaileek, Europako Alderdi Popularraren eta Sozialista eta Demokraten bloke handiak amaitu egingo direlako (nahiz eta boto gehien eskuratuko dituzten indarrak izango diren) eta batik bat eskuin muturrean kokatutako alderdi berriak sartuko direlako, Europaren aurkako ideia nazionalista eta populistekin.

Eskuin muturreko blokea

Eskuineko alderdi horien dema beren indarra agerian utziko duen bloke handi bat sortzea izango da, gutxienez estatu kideen laurden batetik etorritako 25 diputatu behar baitira Parlamentuan taldea osatzeko.

Matteo Salvini Italiako Barne ministro eta Ligaren buruzagia buru, Europako eskuin muturreko hainbat taldek agerian utzi dute bat datozela, tartean Elkartasun Nazionala Marine Le Pen frantsesaren taldeak, Geert Wilders holandarraren Askatasunaren aldeko Alderdiak eta AfD Alternatiba Alemaniarentzat partiduak.

Hala ere, Vox espainiarrak, PiS Legea eta Justizia poloniar alderdi ultranazionalistak eta Fidesz Viktor Orban Hungariako lehen ministroaren alderdiak ez dute argitu zer asmo dituzten.

Poloniarrak Kontserbadore eta Erreformisten taldean daude egun, britainiar tori-ekin batera, eta Orbanen alderdiko eurodiputatuak popularren taldean daude Euroganberan, nahiz eta Europako Alderdi Popularrak berak Fidesz taldetik kanporatzea eskatu duen, Europaren aurkako bidea hartu duelakoan.

“Aliantza aurrerakoia” egiteko proposamena

Eskuin muturreko alderdien balizko hazkundearen aurrean, Emmanuel Macron Frantziako presidenteak Europaren proiektua defendatu eta Euroganberan hainbat hamarkadatan nagusi izan den kontserbadoreen eta sozialisten ohiko koalizioa atzean utziko duen “aliantza aurrerakoi” baten alde egin du. Antonio Costa Portugalgo lehen ministroak, Matteo Renzi Italiako lehen ministro ohiak eta beste politikari sozialdemokrata batzuek bat egin dute ideia horrekin.

Hori dela eta, Europako Liberalen taldea, zeina itxuraz hirugarren indarra izango baita berriz ere, funtsezko indarra izango da oreka berriak ezartzeko orduan, baita Berdeak ere.

Brexit-a

Maiatzaren 23tik 26ra botoa ematera deituta dauden 402 milioi europarrek aukeratuko duten Parlamentuak 751 eserleku izango ditu ostera ere, Erresuma Batuak ordezkaritza izaten jarraituko duenez, brexit-erako aurreikusitako epeak ez betetzeagatik.

Dibortzioa legegintzaldi honetan gauzatuz gero, britainiar eurodiputatuak berehala kaleratuko dituzte, eta Parlamentua 705 eserlekura txikituko da. Hortaz, Estatu kideen artean beste banaketa bat egingo da.

Iruzkinak

  • Publizitatea
    • BILATZAILEA
    Publizitatea
    Publizitatea
    Publizitatea

    Bisitatuena

      Kargatzen ikusiena
      Kargatzen ikusiena