Ultraeskuinaren gorakadari so hautatu dituzte europarlamentariak Ipar Euskal Herrian

Ipar Euskal Herriko hautesleek Europako Parlamentuko ordezkariak hautatu dituzte, Frantziako estatuko hautesleekin batera, Bruselan egongo diren 79 parlamentariak aukeratzeko barruti bakarra dago eta. 18:00etan itxi dira hauteslekuak.

Horrelakoetan, euskal hautagaiak gutxi dira eta Frantziako estatu osoan hautatuak izateko aukera gutxi dute. Hauteskunde kanpaina ez da asko nabarmendu Ipar Euskal Herrian.

Pirinio Atlantikoak departamenduan, parte-hartzea % 43,99koa izan da 17:00etarako, orain dela bost urte baino sei puntu gehiago.

Frantziako estatuan 8 puntu igo da parte-hartzea, % 43,29koa izan baita.

Europako hauteskunde hauek Emmanuel Macronen lehenengo azterketa dira, agintean bi urte eman ostean eta txaleko horien krisiaren erdian. Lehia espero da horren Errepublika Martxa alderdiaren eta Marine Le Penen Bilgune Nazionalaren artean.

Bigarren itzulirik ez dagoenez, Le Penen alderdia irabazle izan daiteke hauteskunde hauetan.