Albisteak -
Mikrokredituak
Nafarroako Ahal Duguk 10.000 euro bildu ditu bi egunetan
Hauteskunde autonomikoen kanpainarako 36.000 euro baino gehiago eskuratu zituzten, eta datozen hauteskunde orokorrei begira, datu hori hobetu nahi dute.
Agentziak | Erredakzioa
Nafarroako Ahal Dugu alderdiak 10.000 euro bildu ditu bi egunetan, hauteskunde orokorretako kanpaina finantzatzeko helburuarekin martxan jarritako “sistema berritzaile bati esker”, Segundo Gonzalez alderdi horretako Finantza eta Informazio Gardentasun arduradunak azaldu duenez.
Halaber, mikrokredituak emandako herritarrei, hauteskundeen ostean itzuliko diete dirua, interesik gabe. Modu horretan, alderdiak “finantziazio garbia” bilatzen du, bankuekin baino gehiago, “zorra pertsonekin sortuko duena”.
Hori dela eta, mikrokreditu horiek “herritarren menpe daude soilik, eta enpresa handiek ez daukate zerikusirik”. Aldi berean, neurri honekin biztanleekin bat egitea lortzen dutela aipatu dute, diru-laguntza hauek hauteskunde-kanpaina aurrera eraman ahal izateko guztiz garrantzitsuak direlako.
Pasa den hauteskunde autonomikoetan, Nafarroako Ahal Duguk 36.000 euro baino gehiago lortu zituen, eta datozen hauteskundeei begira, datu hori hobetzea espero dute.