Euskotren Liga: Orio
Euskotren Bandera
Oriok bere garaipen bolada luzatu du, Euskotren Bandera irabazita
A. B. E. | EITB Media
Oriok irabazi du Euskotren Ligako Euskotren Bandera. Oriotarrek garaipenen bolada luzatu dute, seigarren Bandera jarraian eskuratuta, eta lidertza sendotu dute Euskotren Ligako sailkapen nagusian.
Oriok irabazi du Euskotren Bandera igande honetan (uztailak 31) Lekeitioko uretan erakustaldia emanda. Oriotarrek seigarren Bandera jarraian bereganatu dute eta lidertza sendotu dute Euskotren Ligako sailkapen nagusian.
Hasieratik estropadaren buruan jarri da Orio eta ziabogan 9 segundo atera dizkio Arraun Lagunaki; Tolosaldeari eta Donostiarrari, aldiz, 15 segundo atera dizkio. Azken luzean oriotarrek ez dute erritmoa moteldu, eta arazo handiegirik gabe lortu du garaipena. Arraun Lagunak izan da bigarren, 9 segundora. Tolosaldeak amaitu du hirugarren postuan Oriorekiko 17 segundora eta Donostiarra izan da laugarren, 24 segundora.
Euskotren Ligako sailkapen nagusian Orio da liderra 30 punturekin. Arraun Lagunak da bigarren 26 punturekin. Hirugarren postuan dago Donostiarra (13 puntu) eta laugarren da Tolosaldea (11 puntu).
Euskotren Banderako sailkapena. Argazkia: EITB Media
Euskotren Ligako sailkapena, Euskotren Banderaren ostean. Argazkia: EITB Media
