Ekonomia -
Iruña
Volkswageneko langileek oniritzia eman diote lan-hitzarmen berriari
UGTk, CCOOk eta CCk enpresarekin lotutako aurreakordioa babestu dute boto-emaileen % 62,51k; % 32,2, berriz, kontra agertu da.
Erredakzioa
Nafarroako Volkswageneko langileek oniritzia eman diote, gaur goizaldean amaitu den erreferendumean, UGT, CCOO eta CC sindikatuek enpresarekin lotutako lan-hitzarmenaren aurreakordioari.
Langileek egindako bozketaren emaitza honakoa izan da: 3.638 langilek eman dute botoa (% 84,78), eta horietatik 2.274 (% 62,51) alde agertu dira, eta 1.175 (% 32,2), kontra.
Erreferenduma 03:30 aldera amaitu da, gaueko txandako langileen bozketarekin. UGT enpresa batzordeko sindikatu nagusiaren esanetan, normaltasun osoz hasi eta bukatu da bozketa.
Jose Luis Manias (UGT) enpresa batzordeko presidenteak azaldu duenez, lan-hitzarmen berria aurrera eramatea "esfortzu handia" eta "erronka bat" izango da datozen hilabeteetan, puntu batzuk gatazkatsuak izango baitira; aurre-erretiroak eta soldata igoerak, besteak beste.
Nafarroako Volkswagen enpresako zuzendaritzak eta UGT, CCOO eta CC sindikatuek VIII. Lan-hitzarmenari buruzko aurreakordioa lotu zuten urriaren 10ean, eta 5 urterako balioa izango du.
Enpresaren arabera, aurreakordioak fabrikaren etorkizuna bermatzen du, langileen erosteko ahalmenari eusten dio (aurreko urteko KPIaren adinako soldata-igoera aurreikusten baitu) eta 215 orduko lanaldia ezartzen du.
KPIaren igoeraz gain, "ekoizpen bonusa" ere aipatzen da lan-hitzarmen berrian, eta ekoizten den ibilgailu kopuruaren arabera emango litzateke.
