Galdaketako multinazionalak eta Euskadiko enpresak, eskutik helduta

Alstom, Volvo edota Scania multinazionalek, besteak beste, Euskadiko galdaketa alorreko 20 bat enpresaren arduradunekin bilerak egingo dituzte gaur, Bilbon, Munduko 71. Galdaketa Kongresuan.

Bilera horiei esker, EAEko enpresek bezero garrantzitsuenen beharrak ezagutu ahal izango dituzte, eta multinazionalekin harremanak estutu eta bultzatu, antolatzaileek ohar batean azaldu dutenez.

Frantzia, Suedia, Alemania, Danimarka, Italia eta Luxenburgoko enpresetatik etorri dira gurera, Bilboko Kongresuan parte hartzera. Besteak beste, energia, automozioa, aeronautika eta makina-erreminta alorreko enpresak dira.

Kongresuaren bigarren eguna da gaurkoa, eta bertara nazioarteko 850 bat aditu hurbildu dira. Galdaketaren Nazioarteko Erakundeak, Ik4-Azterlanek eta Tabiera Institutuak antolatu dute.

Galdaketaren alorra “berritzaileagoa” eta “jasangarriagoa” egitea da bilkura horren helburu nagusia.

Estatu mailan, urtean 1,3 milioi tona (5.000 milioi euro) ekoizten ditu galdaketa sektoreak, eta 50.000 pertsonak lan egiten dute alor horretan.