Ekonomia -
Balizko salmenta
Gerdauk ukatu egin du Sidenor saltzeko erabakia hartu izana
Enpresa brasildarrak esan du Basauriko, Gasteizko, Legutioko, Maltzagako, Legazpiko eta Azkoitiko lantegien inguruan hartzen dituen erabakiak jakinarazi egingo dituela.
agentziak | erredakzioa
Gerdau siderurgia enpresa brasildarrak iragarri du ez duela Sidenor filiala saltzeko erabakirik hartu. Sidenorrek lantegiak ditu Basaurin, Gasteizen, Legution, Maltzagan, Legazpin eta Azkoitian, eta 1.500 langile ditu.
Brasilgo Baloreen Merkatuak galdetu dio Gerdauri zer egiteko asmoa duen, izan ere, prentsan argitaratu dute Santander bankuak Sidenorren Espainiako Estatuko lantegiak saltzeko agindua jaso duela.
Gerdauren esanetan, konpainiak maiz aztertzen ditu "aktiboak optimizatzeko aukerak, negozioak handitzeko asmoz".
Horregatik, "inbertsio bankuen aholkularitzara jotzen du", gaineratu du.
Gerdauk azpimarratu du merkatuari jakinaraziko dizkiola uneoro garrantzizkoak diren aktiboen inguruan hartzen dituen erabakiak.
