CELek Italiako multinazional baten eskaintza jaso du

Dirudienez, Lucart enpresa italiarra administratzaileak eskatzen dituen 6 milioi euroak ordaintzeko prest azaldu da, eta CELek dituen 250 langileetatik 145 mantenduko lituzke, ETBk jakin ahal izan duenez. Sindikatuen arabera, baina, proposamena ez da nahikoa, eta laguntza eskatu diete euskal erakundeei.

Aste honetan bertan, CEL taldeko langileek giza katea egin dute Bilbon, "bideragarritasun plan bat eta lanpostuak nahiz lan-baldintzak mantentzea eskatzeko".

Mobilizazio horrekin, enpresa hartzekodunen konkurtsoan sartu zenetik kinka larrian dagoela salatu dute.

Sindikatuetako ordezkarien esanetan, "lanean ari gara etorkizuneko proiektu bat lortzeko, eta egungo lanpostuak eta lan-baldintzak mantentzeko".

Ildo horretan, erakundeak "argi eta garbi inplika daitezela" galdegiten jarraituko dutela esan dute, "euren erantzunkizuna" dela eta, "irtenbidearen zati izan behar baitute".

Hala, Enkarterriko alkateei dei egin diete horiek ere behar diren administrazioei presioa egin diezaieten "irtenbide errealak" proposatzeko. Horien arabera, ez Bizkaiko Foru Aldundia ez Eusko Jaurlaritza "ez dira ezertara konprometitu".