Jaurlaritzak ikuskari gehiago jarri ditu pisu turistiko ilegalak antzemateko

Alfredo Retortillo Eusko Jaurlaritzako Turismo, Merkataritza eta Kontsumo sailburuak onartu du oraindik ere badela pisu turistikoen "poltsa klandestino" bat, batez ere, Donostian, baina murriztuz joango denaren ustea du. Horretarako, Jaurlaritzak ikuskari taldea indartu du.

Zehatz-mehatz esanda, Turismo saileko ikuskaritza zerbitzuan hamar ikuskari eta lau langile gehiago hasi berri dira lanean (tartean aholkulari juridikoak eta administratiboak). Halaber, bereziki, Donostiako taldea indartu da.

Radio Euskadiko "Boulevard" saioan egin dioten elkarrizketan azpimarratu duenez, urteko lehen sei hilabeteetan nabarmen gora egin du Euskadira iristen den turista kopuruak, iazko epe berean baino 65.000 gehiago. Dena den, turista kopuruari dagokionez, ukatu egin du Euskal Autonomia Erkidegoa (EAE) bere mugara iristen ari dela.

Zenbaitetan turismoaren arrakasta turista kopuruaren arabera neurtzen dela deitoratu du, eta turismoak ekonomian duen eraginean jarri behar dela azpimarra gaineratu du.

Bestalde, pisu turistikoei buruzko dekretua hilaren 26an argitaratuko da aldizkari ofizialean.

Jatorrizko informazioa Radio Euskadik landu eta eitb.eus-ek itzuli du.