Ekonomia -

Koronabirusa

Kontziliaziorako laguntzen ordainketaren aurrerapena ukatu du Legebiltzarrak

EH Bilduren legez besteko proposamena Elkarrekin Podemosek bakarrik babestu du, EAJk eta PSEk aurka bozkatu dute eta PP abstenitu da.

Langile autonomoentzako kontziliazio-laguntzen ordainketak aurreratzea ukatu da. Argazkia: EFE.
Langile autonomoentzako kontziliazio-laguntzen ordainketak aurreratzea ukatu da
Langile autonomoentzako kontziliazio-laguntzen ordainketak aurreratzea ukatu da. Argazkia: EFE.

Agentziak | Erredakzioa

Whatsapp Facebook Twitter Telegram Email

Eusko Legebiltzarrak atzera bota du kontziliazio-laguntzen ordainketa aurreratzea eskatzen duen EH Bilduren proposamena, lanaldi-murrizketak edo eszedentziak eskatu behar izan dituzten langile autonomoei edo seme-alabak zein mendekoak zaintzeko lanak beren gain hartu dituztenei zuzenduta.

Laguntza horiek apirilean arautu zituen Eusko Jaurlaritzak, agindu baten bidez, eta horrek zehazten du eskaerak, EH Bilduk gogorarazi duenez, ezingo direla alarma egoera amaitu arte aurkeztu.

Ikastetxeen, adinekoen eta mendekoen zentroak ixteak eragin dien familiei eta COVID-19agatik kutsatutakoen edo isolatutakoen familiei zuzendutako dirulaguntzak dira. Horretarako, 15 milioi euroko aparteko kreditua esleitu da.

EH Bilduk astelehen honetan Legebiltzarreko Diputazio Iraunkorrean eztabaidatu den legez besteko proposamena Elkarrekin Podemosek bakarrik babestu du; EAJk eta PSEk, berriz, kontra bozkatu dute, eta PP abstenitu egin da; beraz, atzera bota dute.

Hala ere, aurrera atera da Eusko Jaurlaritzan bazkide diren bi alderdien (EAJ eta PSE) zuzenketa bat, PPren abstentzioari esker (EH Bilduk eta Elkarrekin Podemosek aurka bozkatu dute).

Hala, Legebiltzarrak Eusko Jaurlaritzari eskatu dio azter dezala kontziliaziorako laguntzen egokitzapena, epe ertain eta luzean COVID-19aren eraginaren ondorioz euskal familietan sor daitezkeen beharrei erantzuteko.

EH Bilduk ordaintzeko eran aldaketak eskatu ditu, familiek eskaera onartu bezain laster dirua jaso dezaten, hilabeteak itxaron behar izan gabe. Era berean, familia guztiengana partida ekonomiko nahikoa bermatzeko eskatu dute.

Halaber, laguntzak 16 urterainoko adingabeak zaintzeagatik luzatzeko eskatu du, egun gehienezko adina 14 urtekoa baita.

Proposamenaren defentsan, Eba Blanco EH bilduko legebiltzarkideak adierazi du laguntzek genero-desberdintasunean sakontzen jarraitzen dutela, eta salatu du ia urtebete igaro dela onuradunak lanetik era partzialean edo totalean alde egin behar izan zuenetik.

Familia askok azaldu dutenez, diru-sarrerarik gabe biziraun beharko dute hainbat hilabetetan, eta, gainera, aurrekontu-partida agortu egin daiteke, laguntzak eskatzaile guztiengana iritsi gabe.

Jon Hernandezek (Elkarrekin Podemos) bat egin du proposamenarekin; izan ere, adierazi duenez, kobrantza zenbat eta lehenago bermatu hobea izango da familientzat, eta aurrekontua eskariari egokitzeko ere eskatu du.

Proposamen horren aurka agertu diren taldeetatik, Alaitz Zabalak gogorarazi du Enplegu eta Gizarte Politiketako Sailak dagoeneko iragarri duela eskaerak alarma egoera amaitu aurretik aurkez daitezkeela, eta eskaera gehienei "ahal den neurrian" erantzuteko konpromisoa ere hartu duela. Beharretara etengabe egokitzeko prozesu bizia dela nabarmendu du.

Txarli Prietok (PSE) deitoratu egin du EH Bilduk laguntzak ebaluatu gabe proposamen hori Legebiltzarrera eraman izana, eta horiek gauzatzeko denbora eskatu du. Eusko Jaurlaritza higatzeko "elektoralismoa" ere egotzi dio koalizioari.

Carmelo Barriok (PP) laguntza horiek eraginkorrak eta nahikoak izatea eskatu du.

Hau zure interesekoa bada, baliteke beste gai hauek ere izatea
EAJ-PNV PP Eusko Legebiltzarra EAE albisteak Gizartea Ekonomia EH Bildu PSE-EE Eguneko albisteak Albisteak Podemos Ahal Dugu Euskadi Osasun albisteak Umeak albisteak Enpresaburuak Koronabirusa Gurasoak Dirulaguntzak Gaixotasunak argazkiak