Kelvion multinazionalak ez du Igorreko lantegia itxiko

Kelvion Therma Solutions enpresako langileak akordio batera iritsi dira Alemaniako multinazionalarekin eta Igorreko lantegiak irekita jarraituko du. 74 lanpostutatik 43 mantentzea adostu dute.

Multinazionalak lan-erregulazioa espedienteak aurkeztu zituen Igorren, Madrilen eta Kantabrian dituen lantegietan. Beharginek grebara jo zuten eta 37 egun geroago, multinazionalarekin akordioa egin dute konpainiak, gutxienez beste lau urtez, Igorren jarrai dezan.

ELA sindikatuak lantaldea zoriondu du, "haien esfortzuari eta konpromisoari esker lortu dugulako beste enpresa baten deslokalizazioa ekiditea". "Gaur, Arratiako bailaran beste enpresa bat ixtea saihestu dugu", erantsi dute azkenaldian hainbat lantegi zarratu dituztela gogoratuta.

Bestalde, LAB sindikatuak zehaztu du langileek orain artea indargabetuta egongo diren hainbat eskubide soziala berreskuratuko dituztela eta konpainiak aurre-erretiroak onartzeko konpromisoa hartu duela.

Horrela, bada, lana orain uzten duten beharginek urteko 30 eguneko kalte-ordaina jasoko dute, 50.000 euroko gehienezko mugarekin.

Horrez gain, behargin horiekin lan-poltsa bat osatuko dute eta edozein unetan kontrataziorik egin behar bada, behin-behinekoa nahiz mugagabea, langile horiek izango dute lehentasuna.  

Amaitzeko, LAB sindikatuak bere esker ona adierazi die Arratiako herritarrei, oro har, eta Igorreko herritarrei eta erakundeei, bereziki, lan-gatazka honetan "eman diguten babesagatik eta elkartasunagatik".