Ekonomia -

Euskaltel

MasMovil: "Euskaltel marka eta Derioko egoitza mantenduko ditugu"

Radio Euskadin egindako elkarrizketa batean, Maini Espenger MasMovileko zuzendari kudeatzaileak nabarmendu du enpresak erosi dituzten bakoitzean "enplegu gehiago" sortzea lortu dutela.

Maini Spenger. Argazkia: EITB Media
Maini Spenger. Argazkia: EITB Media
Hazkunde proiektua dela dio MasMovilek, enpresa biak osagarriak direlako

1:33

EITB Media

Whatsapp Facebook Twitter Telegram Email

MasMovil konpainiak Euskaltel erosteko eskaintza egin du eta ekimenak Euskalteleko hiru akziodun nagusien babesa dauka: Zegonarena, Kutxabankena eta Albarena.

Radio Euskadin egindako elkarrizketa batean, Maini Spenger MasMovileko zuzendari kudeatzaileak azpimarratu du Euskaltelen markari eta Derioko egoitzari eutsi egingo diela.

"Euskal gizartearentzat  eta kontsumitzaileentzat aukera handia da. Hitzeko pertsonak gara eta epe luzerako proiektu jasangarria eta industriala eskaintzen dugu", adierazi du.

Spengerrek esan du Euskaltelen bezeroek hainbat abantaila izango dituztela, hala nola "errendimendurik handieneko zuntz optikoa erabiltzeko aukera izango dute".  Halaber, 5G teknologia Euskadin ezartzeko inbertsioak lehenetsiko dituztela erantsi du.

Euskaltelen jatorriari buruz galdetuta, marka eta egoitza aldatzeko asmorik ez dutela ziurtatu du. "Bi konpainiak bateragarriak dira, eta MasMovilen jarduera Euskaltelek zuzendu dezake Espainian".  

Spengerrek zehaztu duenez, konpromisoa epe ertain-luzerako hartu nahi dute eta aurrerago soilik aztertuko lukete konpromiso hori aldatzea, "betiere akziodunen % 90etik gora ados badaude”. “Une honetan ez dugu aldaketarik egiteko inolako asmorik", berretsi du.  

Euskalteleko akziodun nagusien babesa eskertuta, MasMovilen asmoa "Euskadi teknologia mailan goian" jartzea dela adierazi du.

Horrez gain, MasMovilen ibilbidea aztertzeko deia egin du: "Beste enpresa batzuk erosi ditugunean lanpostu gehiago sortu dira. Hazi egin nahi dugu".

 

Hau zure interesekoa bada, baliteke beste gai hauek ere izatea
Telefonia mugikorra Ekonomia Eguneko albisteak Albisteak Kontsumoa Enpresaburuak 5G