Ekonomia -
Sistema aldaketa
Udaltzainak kudeatzeko sistema "kale egiten" ari da, ErNEren arabera
Polizia sindikatuak salatu duenez, hainbat udalek Arkautiko zerrendatik kanpo bilatu behar izan dituzte agenteak, "modu irregularrean eta aukera berdintasuna oztopatuz".
E. G. | EITB MEDIA
Ertzaintzaren ErNE sindikatuaren arabera, Udaltzaingoaren baitan langileak kudeatzeko sistema "kale egiten" ari da, Arkautiko Akademiaren esku utzi ostean, langile faltagatik "arazoak sortu" direlako.
Lehen udalek kudeatzen zuten udaltzainak kontratatzeko sistema, baina orain, Arkautiren esku utzita, tokian tokiko erakundeek "agenteak edozein tokitan bilatu behar izan dituzte, Arkautiko behin-behineko langileen zerrendan jenderik ez dagoelako", sindikatuak ohar batean salatu duenez.
ErNEk egoera horren adibideak eman ditu. Hala, Mungian eta Trapagaranen (Bizkaia) eta Arrasaten, Eibarren eta Zarautzen (Gipuzkoa) udaltzainak kontratatzeko prozesuak jarri behar izan dituzte martxan, Akademia bazter utzita. "Behin-behineko langileentzat formazio ikastaroak atera behar izan dituzte korrika eta presaka, modu irregularrean, publiko egin barik, eta aukera berdintasuna oztopatuz", kritikatu du.
Sindikatuaren ustez, beharrezkoa da kudeaketa sistema horren inguruko "eztabaida serioa" egitea "behin-behinekotasuna ez delako konponbidea, adabakia baizik, eta ErNEk urteak daramatza hori salatzen".