Itxi

2021/08/13

17:25

Ekonomia

Argindarra

OCUren gomendioak argindarraren prezioaren gorakadaren harira: Nola aurreztu daiteke abuztuko fakturan?

Agentziak | EITB Media

Kontsumitzaileen eta Erabiltzaileen Elkarteak (OCU, gaztelaniazko sigletan) azaldu duenez, kontsumo bererako % 30eko aldea dago tarifa garestienen eta merkeenen artean. Hori dela eta, oso gomendagarria da konpainia elektrikoarekin kontratatutako tarifak berraztertzea.

  • Bonbilla bat, piztuta. Artxiboko argazkia: Pixabay

    Bonbilla bat, piztuta. Artxiboko argazkia: Pixabay

  • Whatsapp
  • Whatsapp
  • Telegram
  • Bidali

Ostiral honetan argindarraren prezioak beste marka bat hautsi du. Hori dela eta, Kontsumitzaileen eta Erabiltzaileen Elkarteak (OCU, gaztelaniazko sigletan) "kontsumo-ordutegiei erreparatzea" gomendatu die herritarrei; izan ere, "kontsumitzaileak urtean 400 euro aurreztu ditzake fakturan", erakundeak egindako kalkuluen arabera.

Ildo horretatik, Manuel Vivas OCUko bozeramaileak azaldu duenez, "egokiena etxetresna elektrikoak haraneko ordutegian erabiltzea da", alegia, 24:00etatik 08:00etara eta asteburuan, baina beti ez dela posible onartu du.

Hori dela eta, eraginkorrena eta garrantzitsuena "ordutegi-tarte garestienak saihestea da, hau da, puntako ordutegia, 10:00etatik 14:00etara eta 18:00etatik 22:00etara". OCUko bozeramailearen esanetan, "hori da saihestu beharreko ordu-tartea, urtean 400 euro aurreztu ahal izango baitira". Dena dela, argi utzi du ezin dela erabateko kontsumoa saihestu, "hozkailua beti piztuta dagoelako eta, udarekin batera, aire girotua ordu horietako batean jartzen delako".

Testuinguru horretan, "konpainia elektrikoarekin kontratatutako tarifak berraztertzea" gomendatu die OCUk kontsumitzaileei, izan ere, "kontsumo bererako % 30eko aldea dago tarifa garestienen eta merkeenen artean".

"Edozein arrazoirengatik tarifa merkeena aurkitzea zaila bada edo horrekin argitzen ez bada, zalantzaren aurrean, araututako tarifa bat kontratatzea da aholkua, tarifa merkeagoen talde horretan beti egoten dena", gaineratu du Vivasek.

Azkenik, bozeramaileak azpimarratu du autokontsumoa "beste aukera bat" izan daitekeela argindarraren igoerari aurre egiteko, eta azpimarratu du "gero eta interesgarriagoa" dela "energia prezio altuan dagoelako". Ildo horretatik, "ez dela beharrezkoa txalet bat izatea modulu fotovoltaikoak jartzeko".

"Bizilagunak ados jar daitezke eguzki-panel horiek jartzeko eta, hasierako kostua handia izan daitekeen arren, gure ustez, hamar urte baino lehen inbertsio hori amortizatuko litzateke", gaineratu du OCUko bozeramaileak.

Abuztuko zortzi egunetan inoizko preziorik garestienak izan dira

Argindarraren merkatuaren prezioaren garestitzea isurketa-eskubideen prezio altuek eta gas naturalaren garestitzeak eragin dute.

Zehazki, isurketa-eskubideak garestitu egin dira abuztuko hasiera honetan, tonako 54 eurotik gora, urte hasieran 33 euro inguru kotizatzen baitzuten. Bestalde, gas naturalaren prezioa 41,7 eurora igo da MWh bakoitzeko, Mibgasen datuen arabera.

Energiaren prezioak % 24 inguruko pisua du fakturan, eta % 50-55 inguru bidesariei (garraio- eta banaketa-sareen kostua) eta karguei (berriztagarriak sustatzeari lotutako kostuak, penintsulaz kanpokoak eta tarifa-defizitaren urtekoak) dagokie, eta gainerakoa zergei.

Eguneko prezioaren gorabeherek tarifa arautua (PVPC) duten kontsumitzaileei eragiten diete, hamar milioi pasatxo, eta merkatu librean daudenak (17 milioi inguru) salbuetsita daude, konpainiarekin hitzartutako prezioa baitute.

Uztailean % 36 garestitu zen faktura

Erabiltzaile baten batez besteko argindarraren faktura % 36,2 garestitu zen uztailean, iazko hilabete berarekin alderatuta, eta 85,34 euro ordaindu behar izan zituen, Facuak emandako datuen arabera.

Ildo horretatik, BEZa % 10era jaitsi da abendura arte, orduko megawattaren batez besteko prezioa 45 eurotik gora dagoen bitartean. % 21eko BEZa aplikatzen jarraituz gero, marka guztiak hautsiko zituen ordainagiriak, 93,88 eurora iritsita, elkartearen arabera.

  • Bisitatuena

      Kargatzen ikusiena
      Kargatzen ikusiena
    ;