Ekonomia -
ENERGIA BERRIZTAGARRIAK
Siemens Gamesak itsasoko parke eolikoetarako palak egingo dituen lantegia eraikiko du AEBn
Euskal konpainiak 170 milioi euro inbertituko ditu Virginiako lantegi berrian. 2,64 gigawatteko potentzia izango duten palak egingo dituzte bertan.
AGENTZIAK | EITB Media
Itsasoko parke eolikoetarako palak egiteko bere lehen lantegia irekiko du Siemens Gamesak Ameriketako Estatu Batuetan (AEB). Aerosorgailuak egiten dituen euskal konpainiak 170 milioi euro inbertituko ditu fabrika berrian, 2,64 gigawatteko potentzia izango duen makroproiekturako aerosorgailuen palak egiteko.
Ohar baten bidez konpainiak azaldu duenez, Dominion Energy elektrizitate enpresa estatubatuarrak haize-errotak hornitzeko eskaera irmoa egiten duenean hasiko da egiten Portsmoutheko (Virginia) itsas terminalean kokatuko den eta 32 hektarea hartuko dituen instalazio berria.
Proiektu honek 200 milioi dolarretik gorako inbertsioa eskatuko du, eta 260 lanpostu inguru sortuko ditu errendimendu betean dagoenean. Horrez gain, beste 50 langile kontratatuko dira Coastal Virginia parkeko mantentze-lanak egiteko.
Bestalde, Siemens Gamesak fabrika handitzeko aukera aztertuko du, Virginia estatuan proiektu berriak lortzen baditu. Lurralde hori da, hain zuzen ere, AEBn itsasoko energia eolikoaren sektoreko liderra.
