Itxasok, AHTaren iragarpenaz: "Albiste ona da, ez dut lausotu dezakeen ezer esango"

Denis Itxaso Espainiako Gobernuak EAEn duen ordezkariaren ustez, AHTaren inguruan atzo iragarritakoa "albiste ona" da, eta horregatik, ez du "lausotu dezakeen ezertxo ere" esan nahi izan.

Hainbat aldiz galdetu diote Bilboko zein Basauriko alkateek agertutako kexen inguruan, baina ez du "polemikan sartu" nahi izan. Itxasoren arabera, "hau ez da protagonismoa bilatzeko lehia bat, albiste on bat baizik". Radio Euskadiko "Boulevard" saioan egin dioten elkarrizketa batean azpimarratu duenez, "lur azpiko behin betiko geltokia ez da inoiz zalantzan egon".

Itxasok nabarmendu du behin-behineko geltokiaren irtenbidea "elkarrizketa publikoan, politikoan eta instituzionalean" egon dela. "Ez da aurretik aipatu ez den zerbait", gaineratu du.

"Adarrek ez diezagutela basoa ikustea galarazi. Basoa, kasu honetan, albiste ona da, eta ematen du euskal erakundeek ontzat emandako konponbidea dela. Lehendakaria bera behin-behinekotasunaren alde mintzatu zen politika orokorreko eztabaidan, eta hori da mahai gainean duguna", adierazi du.

Asier Iragorri Basauriko alkatearen kexen aurrean, Itxaso prest agertu da harekin biltzeko. Aburtori dagokionez, aitortu du bera ez dela "gai hauetan ohiko solaskidea", eta Bilboko alkateak "informazio guztia" jaso zuela atzo Garraio Estatu idazkariaren eskutik.