Ekonomia -
CNMC
Gasaren prezioa % 500 baino gehiago igo zen Espainian 2021ean
Igoera antzekoa izan da Europako beste herrialde batzuetan. Gasaren ia erdia (% 42,7) Aljeriatik inportatu zen iaz, eta Errusiatik, aldiz % 8,9, Espainiako Merkatu eta Lehia Batzordearen azken txostenaren arabera.
Iker Gonzalez | eitb media
Gasaren prezioaren gorakada merkatu espainiarrean esponentziala izan zen 2020ko abenduaren eta 2021ko abenduaren artean, Errusiako tropen sakabanaketa Ukrainako mugaren inguruan hasita zegoenean, inbasioa hasi aurretik.
Zehatz-mehatz, 2020ko abenduan 18,11 eurotan ordaintzen zen MWh Gasaren Merkatu Iberiarrean (MIBGAS), baina 111,14 euroko kuotara (% 508,6 gehiago) heldu zen hurrengo urteko abenduan, Espainiako Merkatu eta Lehia Batzordeak 2021 urteko handizkako merkatuari buruz argitaratu duen azken txostenean agertzen denez.
Igoera ikaragarri hori gas naturalaren ekoizpena nazioartean % 5 handitu zen testuinguruan eman da. Igoerak AEBko ekoizpenaren gorakadak lagunduta egin du gora, % 50 handiagoa izan baita, munduko hirugarren handienean bihurtuta, Australia eta Qatarren ostean.
Gasaren prezioaren gorakada etengabekoa izan da 2020ko udazkenetik aurrera, pandemiaren osteko susperraldi ekonomikoagatik, hidrokarburoen demanda aktibatu baitzuen berriz.
"Zehazki, merkatu asiarreko demandaren igoerak tentsioa eragin zuten nazioarteko merkatuan, bai Asian, baita Europan ere", dio txostenak.
2021ko udazkenean, urrian hain zuzen, lurrazpian dauden gas-biltegien betetze maila oso baxua zen aurreko urtearekin alderatuta, gehien bat "gas errusiarra mugatu zelako epe luzean, eta geopolitikan sortu zen ziurgabetasunagatik, Errusia eta Ukraina artean sortutako tentsioen ondorioz, eta NordStream 2 gasbidearen funtzionamendua atzeratu egin zelako".
Gasaren ia erdia, Aljeriatik
Merkatu espainiarra hornitzen duen herrialde garrantzitsuena Aljeria izan da epe horretan, handik inportatu egin baita gasaren % 42,7 (2020an baino % 16,6 gehiago); ondoren, AEB (% 14,2), Nijeria (% 11,5), Errusia (% 8,9) eta Qatar (% 6,3) kokatu dira.
Espainian bertan ekoitzitako gasa (1.418 GWh) "Viurako (Errioxa) hobitik hartutakoa da, eta merkatuko gasaren % 0,34 besterik ez da izan", txostenaren arabera.
Azpimarratzekoa baita ere Magrebeko gasbidearen etetea, Aljeria eta Marokoren artean sortutako desadostasunengatik, gasaren garraioari buruzko kontratua dela eta.
